Semeytany.kz — Абай облысының делегациясы Түркістан облысы әкімдігі мен Корея Республикасының Губернаторлар ассоциациясы (GAROK) ұйымдастырған «Орталық Азия – Корея Республикасы» жергілікті өзін-өзі басқару органдарының екінші ынтымақтастық форумына қатысу үшін Түркістан облысы мен Шымкент қаласына жұмыс сапарымен барды.
Делегация құрамында облыс әкімінің бірінші орынбасары Ербол Садыр, Мақаншы және Үржар аудандарының әкімдері, облыстық басқарма басшылары, бизнес өкілдері мен сәулетшілер бар. Жалпы сапарға 20-дан астам адам қатысты.
Сапар барысында Түлкібас ауданында «Майтөбе-Сүт» сүт өңдеу цехының қызметі және «Кен-Тау» ЖШС-нің жеміс-көкөніс сақтау қоймасының жұмысы таныстырылды.
Сайрам ауданында «Kaz Eco Meat» ет өңдеу кешені, «Nurym Group» бордақылау алаңы және «DALA-FRUIT.KZ» жеміс-көкөніс кластерінің жобалары көрсетілді. Бұдан бөлек, делегация Түркістан облысындағы бірқатар өнеркәсіптік нысандарды аралады.
Кездесулер өңірлер арасындағы агроөнеркәсіп, өңдеу және логистика бағыттарында әріптестікті кеңейтуге, тәжірибе алмасуға және ықтимал бірлескен бастамаларды талқылауға арналды.
