Semeytany.kz – Шәкәрім университетінде «Кооперация тетіктері, мемлекеттік қолдау және инвестиция тарту арқылы қой шаруашылығының экспортын ұлғайту» тақырыбында халықаралық семинар-кеңес өтті.
Іс-шараға Абай облысының әкімі Берік Уәли, ҚР Ұлттық аграрлық ғылым академиясының президенті, академик Тілектес Есполов, Павлодар мен Шығыс Қазақстан облыстарының басқармалары, шаруашылық өкілдері және қой өсіру бағытындағы отандық, шетелдік ғалымдар қатысты. Семинарда саланың ғылыми зерттеулері, заманауи технологиялар, халықаралық ынтымақтастық пен экспорттық нарыққа шығу мүмкіндіктері сөз болды.
Кеңес қорытындысында Абай облысы әкімдігі, ҚР ҰАҒА және «Қазақ АӨК экономикасы және ауылдық аумақтарды дамыту ҒЗИ» ЖШС өзара меморандумға қол қойды. Құжат ауыл шаруашылығын тұрақты дамыту, ғылыми-зерттеу жұмыстарын күшейту және азық-түлік қауіпсіздігін қамтамасыз етуге бағытталған.
Аймақ басшысы Берік Уәли қой шаруашылығының ел экономикасындағы маңызын атап өтіп, ғылымға сүйенген тәсілдің қажеттігін айтты. Академик Тілектес Есполов өңірдің аграрлық әлеуеті жоғары екенін, егіншілік, мал шаруашылығы және өңдеу салалары қатар дамып келе жатқанын жеткізді.
Шараға Оман Сұлтандығындағы «Atyab International Services» компаниясының маманы Сеид Кажа Арифуддин халал стандарттары мен азық-түлік қауіпсіздігі протоколдарын енгізу жөнінде баяндама жасады. Сонымен бірге пәкістандық профессор Мұхаммед Камар Билал онлайн қосылып, Пәкістан тәжірибесімен бөлісті.
Облыста қой шаруашылығын қолдау күшейіп келеді: асыл тұқымды мал үлесі 25 пайызға жеткен. Жаңа Семей ауданындағы Шақаман ауылында ет және ет өнімдерін терең өңдейтін өндірістік кешеннің құрылысы жүріп жатыр. Жоба іске қосылғанда кооперативтер құруға жол ашылып, өнімділік пен экспорт мүмкіндігі артады.
Статистикаға сәйкес, Абай облысында 1,5 миллионға жуық қой бар, бұл – республикадағы барлық ұсақ малдың шамамен 6 пайызы. Өңірде бағыты нақты қойылған бұл салада өсім әлеуеті зор.
