Semeytany.kz — Президенттің 2024 жылғы Жолдауында айтылған инфрақұрылым проблемаларын шешу үшін қабылданған энергетика және коммуналдық секторды кешенді жаңғыртуға арналған Ұлттық жоба Абай облысында іске аса бастады. Бұл туралы Өңірлік коммуникациялар қызметіндегі брифингте Табиғи монополияларды реттеу комитетінің облыстық департаменті басшысы Мейр Мадиев пен облыстық энергетика және ТКШ басқармасы өкілдері мәлімдеді.
Ұлттық жоба инженерлік желілердің тозуын азайту, апат жиілігін төмендету, жаңа генерация көздерін салу және қолданыстағыларын жаңарту шараларын қамтиды. Спикерлердің айтуынша, бағдарлама нәтижесінде ел бойынша апаттар саны 20 пайызға қысқарып, энергетикалық және коммуналдық жүйелердің тозуы орташа есеппен 40 пайыз деңгейіне дейін төмендеуі тиіс. Бұл бағытта заңнамаға енгізілген түзетулер табиғи монополиялар субъектілеріне қарыз қаражатын тартуға және оны тариф арқылы өтеуге мүмкіндік береді. Сонымен бірге қаржыландыру мен субсидиялау тетіктері қарастырылған.
Абай облысында қазір коммуналдық қызмет көрсететін 39 табиғи монополия субъектісі тіркелген. Олардың қызметі туралы мәліметтер комитеттің ресми ресурстарында жүйелі түрде жарияланады. Жыл сайын БАҚ өкілдері мен қоғам белсенділеріне арналған баспасөз турлары өтіп, инвестициялық жобалардың орындалу барысы таныстырылады.
Тұрғын үй-коммуналдық шаруашылығы өнімдерін шығаратын кәсіпорындар толық жүктемемен жұмыс істеуді және өндіріс көлемін ұлғайтуды көздеп отыр. Жобаларды қаржыландыру үшін «Қазақстанның Даму Банкі», халықаралық қаржы институттары және екінші деңгейлі банктер арналарын пайдалану жоспарланған. Сондай-ақ мемлекеттік бағалы қағаздар шығару есебінен ірі инфрақұрылымдық бастамаларды қолдау мүмкіндігі қарастырылуда. Бұл тәсіл өңірдегі ішкі өндірісті жандандырып, бәсекеге қабілеттілікті арттыруға және импортқа тәуелділікті азайтуға ықпал етпек.
