Semeytany.kz — Облыс әкімі Берік Уәли Аягөз қаласындағы «Орталық» қазандығында жүргізілген жөндеу жұмыстарының барысын тексеріп, нысанның алдағы жылу маусымына дайындығын бағалады.
Аймақ басшысы қазандықты аралап, атқарылған жұмыстармен танысты. Оның айтуынша, мұндай қуаттылықтағы жабдық Аягөзде бұрын болмаған. «Қуат үш есеге артты. Үш қазандықтың біреуі – негізгі, екеуі – қосалқы. Үкімет сұранысымызды қанағаттандырып, қажетті қаражат бөлді. Қазіргі жұмыстар кестеге сай жүріп жатыр, мәселе менің жеке бақылауымда», – деді Берік Уәли.
Қаладағы ең ірі жылу нысанында №3 қазандық толық күрделі жөндеуден өтіп, 22 қыркүйектен бастап іске қосу-реттеу жұмыстары жүргізілді және осы қазандық арқылы тұрғындарға жылу берілімі басталды. №2 қазандықтағы жөндеу 90% орындалған, оны іске қосу мен реттеу 15 қазанға жоспарланған. Үш негізгі қазандықтың агрегаттары алмастырылып, автоматика мен қауіпсіздік жүйелері жаңартылуда. Мониторинг және бақылау жүйелері орнатылады.
Жылу қазандығы 64 көпқабатты үйді, 2 әлеуметтік нысанды, 5 бюджеттік ұйымды және 183 коммерциялық кәсіпорынды жылумен қамтамасыз етеді. Жалпы абоненттер саны – 1678. Қуаттың ұлғаюы қосымша тұрғын үйлер мен жаңа бизнес нысандарын орталық жылу жүйесіне қосуға мүмкіндік береді.
Қалаішілік инфрақұрылымда да жұмыс жүріп жатыр: ағымдағы жөндеу аясында тозығы жеткен жылу трассаларының 5,2 шақырымы кезең-кезеңімен ауыстырылады. Бұл алдағы маусымда жылу берудің тұрақтылығын қамтамасыз етуге бағытталған.
