Semeytany.kz — Абай облысының әкімі Берік Уәли Аягөз ауданындағы жұмыс сапары барысында аудан орталығында салынып жатқан 600 орындық мектеп құрылысының барысын бақылады.
Үш қабатты білім ордасы «Келешек мектептері» ұлттық жобасы аясында бой көтеріп жатыр. Нысанды ІІ тоқсанда пайдалануға беру жоспарланған. Жаңа мектепте заман талабына сай 35 пәндік кабинет, зертханалар, 256 орындық асхана, 150 орындық акт залы, екі спорт залы, кітапхана және оқу залы қарастырылған. Аймақ басшысы мердігерлерге жұмысты сапалы әрі мерзімінде аяқтауды тапсырды. Оның айтуынша, жаңа ықшам ауданда шамамен 600-ге жуық бала тұрады, мектеп ашылған соң олар өз аудандарында сапалы білім алуға мүмкіндік алады.
Өңір бойынша аталмыш ұлттық жоба аясында қазір екі мектеп салынып жатыр: соның бірі – Семейдің Шығыс кентіндегі 300 орындық мектеп. Облыстағы 8200 орын тапшылығының 31 пайызы осы жобамен тұрғызылып жатқан бес мектеп есебінен өтелмек. Қалған тапшылықты жою үшін республикалық бюджет есебінен алдағы үш жылда тағы 11 мектеп салу көзделген.
Апатты жағдайда деп танылған білім нысандарын алмастыру жұмыстары да кезең-кезеңімен жүріп жатыр: Жарма ауданының Суықбұлақ ауылында 100 орындық жаңа мектептің құрылысы жүргізілуде, Ақсуат ауданы Екпін ауылында 300 орындық мектептің құрылысы басталады. Семейдегі №11 мектептің орнына жаңа ғимарат салуға құжат дайындалып жатыр.
