Semeytany.kz – Жаңасемей ауданында бірнеше ұрпақ бойы ұстаздықты мұрат еткен Ғабдуллиндер әулетінің жалпы педагогикалық еңбек өтілі 392 жылға жетті. Әулеттің іргесін қалаған Қабдырахман Ғабдуллин мен Күләш Нұрбикенова қалтқысыз еңбегімен өңір білім беруіне үлгі болған әжелі-көшелі ұстаздар саналады.
Қабдырахман Ғабдуллин 1950 жылы Семей педагогикалық институтын тәмамдап, еңбек жолын Ұлан ауданындағы С.Аманжолов атындағы мектептен бастаған. Кейін Қайнар орта мектебінде 43 жыл қазақ тілі мен әдебиетінен дәріс беріп, талай буын шәкірт тәрбиеледі. Ол «Қазақ ССР халық ағарту ісінің озық қызметкері» төсбелгісінің иегері, «Әдіскер-мұғалім» атағын алған тәжірибелі педагог.
Жары Күләш Нұрбикенова ұстаздық жолын Күршімдегі Құмаш Нұрғалиев мектебінде бастап, 1959–1987 жылдары Қайнар орта мектебінде математика пәнінен сабақ берді, кейін мектеп директоры болды. 40 жылдық еңбегі «Қазақстан Республикасының білім беру ісінің құрметті қызметкері» төсбелгісімен бағаланған.
Әулеттің бес қызы ата жолын жалғады. Айжан Ғабдуллина Абай ауданындағы Ж.Молдағалиев атындағы мектепте 40 жыл математикадан сабақ беріп, «ҚР білім беру ісінің үздігі» төсбелгісін алды. Гүлжан Ғабдуллина Алматының №145 мектебінде 37 жыл математикадан дәріс беріп, бірнеше жыл оқу ісінің меңгерушісі болды, ал жұбайы Ғазиз Амангелді технология пәнінен 13 жыл еңбек етті. Сәуле Ғабдуллина – бастауыш сынып мұғалімі (22 жыл), Анар Ғабдуллина – бастауыш сынып мұғалімі (30 жыл). Келіндері Торғай Советова С.Бегалин атындағы мектепте технология және физикадан 36 жыл сабақ беріп, «Ұлағатты ұстаз» төсбелгісі мен Білім министрінің Алғыс хатына ие болды. Ләззат Ғабдуллина – Шәкәрім университеті КеАҚ-тың экономика және қаржы кафедрасының аға оқытушысы, PhD, еңбек өтілі – 30 жыл.
Дәстүр екінші буында да үзілмеді. Лаура Әбішева – сызу, сурет, технология пәндерінің мұғалімі (21 жыл), Жанар Әбішева – физика және информатика мұғалімі (20 жыл). Екеуі де Семейдегі №45 мектепте қызмет етеді. Елнұр Әбішев – информатика, робототехника, технология пәндерінің мұғалімі (13 жыл), жұбайы Сандуғаш Серікқызы – қазақ тілі мен әдебиеті пәнінің мұғалімі; екеуі Абай ауданындағы Ж.Молдағалиев атындағы мектепте еңбек етеді. Нұрболат Манатайұлы – дене тәрбиесі мұғалімі (6 жыл), жұбайы Жадыра Иманақышева – С.Бегалин атындағы мектептің биология пәні мұғалімі (6 жыл). Мөлдір Мейрамғалиева – қазақ тілі мен әдебиеті, ағылшын тілі пәндерінің мұғалімі (6 жыл). Еңлік Айтқалиева – қазақ тілі мен әдебиеті мұғалімі, Шәкәрім университетінде жұмыс істейді (3 жыл).
Шөбере буын да білім саласын таңдауда. Назерке – Астана қаласындағы М.Жұмабаев атындағы №65 мектеп-гимназияның мұғалім-дефектологы, Іңкәр – М.Әуезов атындағы педагогикалық колледжді бастауыш білім мамандығы бойынша бітірген, Ақнұр – ағылшын тілі мұғалімі мамандығында оқып жүр.
1950 жылдан бастау алған ұстаздық эстафета осылайша үш буын арқылы сабақтасып, өңір мектептері мен жоғары оқу орындарында жалғасып келеді. Ғабдуллиндер әулетінің 392 жылдық жиынтық еңбек өтілі – Семей өңіріндегі білім беру дәстүрінің беріктігін айғақтайтын жарқын мысал.
