Semeytany.kz — Бүгін облыс әкімі Берік Уәли Семей қаласының Ұшақтар шағынауданында бой көтеретін дене шынықтыру-сауықтыру кешенінің құрылыс алаңында болды.
Жоба жалпы 1,1 гектар аумақта іске асырылады. Ауданы 1770 шаршы метр болатын нысан екі корпустан тұрады және бір мезгілде 115 адамға дейін қабылдай алады. Кешенде 11 үстелге арналған теннис залы, күрес және заманауи жаттығу залдары, сондай-ақ футбол алаңдары қарастырылған. Нысанды 2026 жылдың қыркүйегінде пайдалануға беру жоспарланып отыр.
Аймақ басшысының айтуынша, «Самұрық-Қазына» әл-ауқат қоры мен Абай облысы әкімдігінің бірлескен бұл жобасы Ұшақтар шағынауданы тұрғындары үшін қолжетімді спорт инфрақұрылымын қалыптастырады. Кешен жол бойында, халыққа ыңғайлы жерде орналасады және осы маңдағы спорт нысандарының тапшылығын жабуға мүмкіндік береді.
Қорытындылай келе, құрылыс жұмыстары басталды, жоба аяқталған соң қала тұрғындарына салауатты өмір салтын ұстанып, тұрақты түрде спортпен шұғылдануға қосымша жағдай жасалады.
