«AMANAT» партиясының «Таза бейсенбі» экологиялық акциясы аясында Үржар ауданында кезекті тазалық бейсенбілігі болды. Акцияға Бестерек ауылдық бастауыш партия ұйымының мүшелері мен ауыл белсенділері қатысып, Ер Қабанбай ауылының кіреберісін тазалады.
Нәтижесінде 0,7 гектар аумақ қоқыстан тазартылып, 0,3 тонна тұрмыстық қалдық шығарылды. Акцияға 30-ға жуық адам қатысып, табиғатты аялау ісінде ортақ үлес қосты. «Таза ауыл – таза өмірдің бастауы. Табиғатты қорғау – әр азаматтың парызы. Мұндай бастамалар туған жерге деген сүйіспеншілікті арттырып, ұрпаққа үлгі болады», — дейді Бестерек ауылдық бастауыш партия ұйымының өкілдері.
«Таза Қазақстан» — бұл біркүндік акция емес, ендігі өміріміздің салты.
Мемлекет басшысы Қасым-Жомарт Тоқаев: «Тазалық әр адамнан, әр үйден, әр көше мен әр қаладан басталуы керек. Өйткені «Таза Қазақстан» — бұл біркүндік акция емес, ендігі өміріміздің салты» — деп экологиялық мәдениетті қалыптастырудың маңыздылығын үнемі атап өтеді.
Осы ұстанымды басшылыққа ала отырып, «AMANAT» партиясы өңірдің барлық ауданында «Таза бейсенбі» акцияларын тұрақты түрде өткізіп келеді. Мұндай игі істер қоршаған ортаны қорғауға қоғамды жұмылдырумен қатар, экологиялық мәдениетті нығайтуға бағытталған.
Құрметпен, «AMANAT» партиясы Абай облыстық
филиалының баспасөз қызметі
87775133596 Аменова Айнаш
