Semeytany.kz — Бесқарағай ауданының Қоянбай, Қара-Мырза және Долон ауылдарында алғашқы медициналық көмекті жақындататын жаңа медициналық пункттер пайдалануға берілді.
Қоянбай ауылы Ресеймен шекарада орналасқан, мұнда 400 тұрғын бар. Қара-Мырзада – 306, Долонда – 354 адам тұрады. Жобалар «Ауылдық денсаулық сақтауды жаңғырту бағдарламасы» аясында жүзеге асырылды. Жалпы аудан бойынша осы бағдарлама шеңберінде 11 нысан салынды: 4 дәрігерлік амбулатория, 1 фельдшерлік-акушерлік пункт және 6 медициналық пункт.
Жаңа нысандар заманауи талаптарға сай жабдықталған: физиотерапия және процедуралық кабинеттер, орта медицина қызметкерлеріне арналған бөлмелер, дәріханалық пункт жұмыс істейді. Жабдық құрамында нейбулайзер, электрокардиограф, дефибриллятор, екі арналы сенсорлы магнитотерапия аппараты, спирометр, сондай-ақ жоғарғы тыныс алу жолдарын ультракүлгін сәулемен емдеуге арналған стационарлық құрылғы бар.
Бұл медициналық пункттердің іске қосылуы шалғай елді мекен тұрғындарына алғашқы санитарлық-медициналық көмекті қолжетімді етеді. Бастама ауыл медицинасының сапасын арттырып, адамдардың өмір сүру деңгейін жақсартуға бағытталған.
