Semeytany.kz — Бүгін облыс әкімі Берік Уәлидің төрағалығымен өткен кеңейтілген аппараттық кеңесте әлеуметтік маңызы бар азық-түлік бағасын тұрақтандыру, халықты ауыз сумен қамту және тұрғын үйді пайдалануға беру жоспары қаралды.
Жиынға облыстық басқарма басшылары мен өңірлік департамент жетекшілері қатысып, аудан және қала әкімдері бейнебайланыс арқылы қосылды. Азық-түлік бағасы бойынша кәсіпкерлік және индустриялық-инновациялық даму басқармасының басшысы Айбек Рахимбеков пен өңірлік экономикалық тергеп-тексеру департаментінің өкілі Марат Сейілханов баяндама жасады. Бағаны ұстап тұру үшін «Семей» әлеуметтік-кәсіпкерлік корпорациясы 1,8 млрд теңгеге әлеуметтік маңызы бар 9 тауар түріне форвардтық келісімшарттар жасасқан. Қазір өнімдер Семейдегі 12 әлеуметтік павильонда, «ADAL» супермаркеттерінде және 50-ден астам үй жанындағы дүкендерде сатылуда.
Департамент мәліметінше, жыл басынан бері негізсіз қымбаттатудың 800-ге жуық фактісі анықталды. Нарықта өз өнімі жоқ 100 делдал шығарылып, 366 әкімшілік хаттама толтырылды, 14 млн теңге айыппұл салынды.
Ауыз сумен қамтамасыз ету мәселесін облыстық энергетика және ТКШ басқармасының басшысы Раджан Сейітқанов баяндады. Мемлекет басшысының тапсырмасы аясында өңірде 33 жаңа құрылыс жобасы іске асуда. Су желілерін жаңғырту бойынша 28 жоба жүріп жатыр: соның 25-і — ауылдарда, 3-і — Семей қаласында.
Аймақ басшысы бірінші орынбасары Ербол Садырға және жауапты басқармаға аудан-қалалардағы бағаны тұрақтандыру комиссияларының жұмысын талдап, белсенділігін арттыруды тапсырды. Сауда орындарында шекті бағалардың сақталуын қатаң бақылап, өндірушіден дүкенге тікелей жеткізу тетігін әзірлеу міндеттелді. Сонымен қатар ауыз су жобаларының орындалуын күнделікті мониторингте ұстап, құрылыс кестесінен ауытқымауды тапсырды. Аудан және қала әкімдеріне жыл соңына дейін аяқталуға тиіс нысандарды толық іске қосу жөнінде нақты шаралар қабылдау жүктелді.
«Халықты 100 пайыз ауыз сумен қамту — тұрғындардың өмір сапасын арттыратын басты міндет. Әр жоба мерзімінде әрі сапалы орындалуы тиіс», — деді Берік Уәли.
