Semeytany.kz — Астанада «AMANAT» партиясының ұйымдастыруымен өткен республикалық «Mugalim Talks» алаңына елдің түкпір-түкпірінен 300-ден астам ұстаз, ғалым және студент жиналды. Биылғы басқосуда жасанды интеллект дәуіріндегі білім беру жүйесі және мұғалімнің рөлі талқыланды.
Абай облысынан Р.Байсейітов атындағы Семей қаржы-экономикалық колледжі директорының орынбасары Асхат Мұханов «Жасанды интеллект және оның білім беру жүйесіндегі мүмкіндіктері» тақырыбында баяндама жасап, ЖИ-ді мұғалімнің сенімді серіктесі ретінде қарастырудың маңызын атап өтті. Оның айтуынша, ЖИ технологияларын тиімді қолдану оқу процесін жетілдіріп, академиялық адалдықты нығайтуға және студенттердің сыни ойлау дағдыларын дамытуға мүмкіндік береді.
Спикер білім беру ұйымдарында ЖИ-ді енгізуге қатысты бірқатар нақты ұсыныстар ұсынды: әр оқу орнында ЖИ қолданудың ашық әрі этикалық ережелерін бекіту, оқушылар мен студенттерге арналған «AI сауаттылығы» пәнін енгізу, техникалық және кәсіптік білім беру жүйесінде «AI-бағдарламашы» жаңа мамандығын ашу арқылы кадрлық әлеуетті арттыру. Сондай-ақ ол қолданбалы бакалаврдың мәртебесін айқындау қажеттігін көтерді.
