Semeitany.kz — Президент Қасым-Жомарт Тоқаев Парламенттік реформа жөніндегі Жұмыс тобының алғашқы отырысында елде саяси және әлеуметтік-экономикалық өзгерістер жүйелі түрде жалғасуы керегін айтты, деп хабарлады Ақорданың баспасөз қызметі.
Мемлекет басшысы «Күшті Президент – ықпалды Парламент – есеп беретін Үкімет» қағидаты аясында билік жүйесін жаңғырту маңызды екенін атап өтті. Оның айтуынша, әлем елдерінің басым бөлігінде бірпалаталы парламент бар, сондықтан бұл модель халықаралық тәжірибеге сай келеді. Дегенмен Тоқаев ортақ ұстаным мен салмақты ұсыныстарға мән берілетінін, барлық пікір мұқият зерделенетінін жеткізді.
Президент қоғамда бастамаға қатысты әртүрлі көзқарас барын еске сала отырып, реформаны шапшаңдатуға болмайтынын айтты. «Парламенттік реформа – ел тағдырына әсер ететін күрделі жұмыс. Мұндай шешім кең ауқымды талқылаудан кейін ғана қабылдануы тиіс», – деді ол.
Жиын барысында Жұмыс тобына ұсыныстарды жинақтап, реформаның ықтимал үлгілерін жан-жақты талдау тапсырылды. Қазір басты мақсат – кәсіби сараптама мен қоғамдық пікірді ескеріп, тиімді әрі оңтайлы модельді айқындау.
