Semeytany.kz – Облыс әкімі Берік Уәлидің төрағалығымен өткен кеңейтілген аппараттық кеңесте жергілікті атқарушы органдардағы кадр тұрақтылығы, әдеп нормалары және мектеп оқушыларын тамақтандыру жайы талқыланды.
Кеңесте ҚР Мемлекеттік қызмет істері агенттігінің Абай облысы бойынша департамент басшысы Руслан Шарипов пен облыстық санитариялық-эпидемиологиялық бақылау департаментінің басшысы Нұржан Ноғайбаев баяндама жасады. Өңірлік кадр резервіне өткен жылы 25 жас маман іріктеліп, бүгінде олардың 11-і мемлекеттік қызметке тағайындалған. Агенттік әр резервшіге жеке мансаптық карта әзірлеп, ұсынылатын лауазымдар тізімін қалыптастырған.
Заңнамаға сәйкес, мемлекеттік грант негізінде оқуын үздік аяқтаған түлектерді аудандық және ауылдық деңгейдегі басшы емес лауазымдарға конкурссыз қабылдау мүмкіндігі бар. Сондай-ақ Мемлекеттік басқару академиясын жоғары нәтижемен тәмамдаған қызметкерлер үшін конкурстан тыс мансаптық ілгерілеу тетігі көзделген. Есепті кезеңде 14 түлек жергілікті органдарға осы тәртіппен қабылданды.
Оқушыларды тамақтандыру бойынша 2023 жылғы қыркүйектен бастап 1–4 сынып оқушылары әлеуметтік мәртебесіне қарамастан 100% тегін ыстық аспен қамтылған. Санитариялық талаптарды сақтау және сапаны тұрақты бақылау мәселелері де назарға алынды.
Берік Уәли облыс әкімі аппаратына аудан-қала әкімдерімен бірлесіп, Мемлекеттік қызмет істері агенттігі департаментінің ұсынымдарын ескере отырып, бос лауазымдарды заң талаптарына сай толықтыруды тапсырды. Сонымен бірге мектеп оқушыларын ыстық тамақпен қамтуды жүйелеу үшін нақты шаралар мен мерзімдері көрсетілген үш жылдық Жол картасын әзірлеу міндеттелді.
