Semeytany.kz — Абай облысында пайдаланылмай жатқан ауыл шаруашылығы алқаптарын мемлекет меншігіне қайтару қарқыны күшейді. Бұл мәселе облыс әкімі Берік Уәлидің төрағалығымен өткен кеңейтілген аппараттық кеңесте талқыланды. Жиынға облыстық басқармалар мен өңірлік департаменттердің жетекшілері қатысып, аудан және қала әкімдері онлайн қосылды.
Кеңесте сәулет, қала құрылысы және жер қатынастары басқармасының басшысы Әнуар Бейсенов пен Абай облысының жер ресурстарын басқару департаментінің басшысы Алмас Тоқсанбаев есеп берді. Ресми мәліметке сәйкес, биыл жоспарланған 170 мың гектардың 151 мың гектарынан астамы мемлекет иелігіне қайтарылған. Жалпы 423 жер учаскесі кері алынды: оның 129,8 мың гектары — жайылым, 13,4 мың гектары — егістік, 8,7 мың гектары — өзге мақсаттағы жерлер.
Жер ресурстарын басқару комитетінің облыстық департаментіне жыл басынан бері жергілікті атқарушы органдар 216 жер пайдаланушыға қатысты, жалпы ауданы 447,4 мың гектар пайдаланылмай жатқан алқап жөнінде материал жолдаған. Биыл департамент 44 тексеріс өткізіп, 43,4 мың гектарда 61 заңбұзушылық анықтады. Нәтижесінде 56 тұлғаға әкімшілік ескерту беріліп, 34 нұсқама бойынша қосымша салық салу шаралары қабылданды.
Президент тапсырмасына сай, 2026 жылдың ортасына дейін қайтарылған жер толық айналымға енгізілуі тиіс. Қазірдің өзінде облыс бойынша 587,3 мың гектар ауыл шаруашылығы айналымына қосылды.
Қорытындысында аймақ басшысы аудан әкімдеріне пайдаланылмаған жерді мемлекетке қайтару жұмыстарын жеделдетіп, жылдық жоспарды толық орындауды тапсырды. Облыстық сәулет, қала құрылысы және жер қатынастары басқармасына аудан әкімдіктерімен бірлесіп, 2026 жылғы 1 шілдеге дейін қосымша 481,5 мың гектарды ауыл шаруашылығы айналымына енгізу міндеттелді.
