Абай облысында соңғы жылдары ауызсу жүйелерін жаңарту бағытында ауқымды жұмыстар қолға алынды. Бұл ретте қайтарылған активтерден жинақталған Арнайы мемлекеттік қордың қаражаты өңір үшін маңызды инфрақұрылымдық мәселелерді шешуге мүмкіндік беріп отыр. Аталған қордың есебінен облыс бойынша су желілерін тарту және сумен қамту нысандарын салу жөніндегі 21 жоба іске асырылуда.
Осы жобалардың бір бөлігі биылғы жылы толық аяқталып, елді мекендерді ауызсумен қамтамасыз ету деңгейін арттыру міндеті кезең-кезеңімен орындалуда. Жоспар бойынша облыс аумағында 355 шақырым жаңа су желісі салынады.
Семей қаласында да су инфрақұрылымын жақсарту бағытындағы жұмыстар кең көлемде жүріп жатыр. Атап айтқанда, су желілерін тарту және жаңарту жұмыстары мына аумақтарды қамтиды: Дорожник, Теміржолшылар және Дзержинец кенттері, Дачная, 2 және 3 Лодочная көшелері, Нахаловка ауданы.
Бұл аудандар көп жылдан бері сумен қамтуда түрлі қиындықтар көрген аймақтар саналады. Жүйені жаңарту нәтижесінде тұрғындардың тәулік бойы сапалы ауызсуға қол жеткізуі қамтамасыз етіледі.
Қайтарылған активтер есебінен қаржыландыру тек қала аумағын ғана емес, облыстың бірнеше ауданын да қамтып отыр. Атап айтқанда: Жанасемей ауданында – Талица ауылы, Бородулиха ауданында – Переменовка және Ремки ауылдары, Абай ауданында – Медеу ауылы, Бесқарағай ауданында – Морозовский лесхоз, Мостик, Жыланды, Кривинка, Башкөл, Малая Владимировка ауылдары, Үржар ауданында – Қызылту, Қазымбет, Таскескен ауылдары, Мақаншы ауданында – Бекет және Қабанбай ауылдары.
Бұл елді мекендерде жаңа су жүйелерінің салынуы тұрғындардың өмір сапасын едәуір жақсартуға бағытталған. Әсіресе су тапшылығын жиі сезінетін шалғай ауылдар үшін бұл – маңызды қолдау.
Арнайы мемлекеттік қордың қаражатын әлеуметтік маңызы жоғары салаларға бағыттау – мемлекет саясатының басты басымдықтарының бірі. Қайтарылған активтерді өңірдің өзекті проблемаларын шешуге пайдалану тетігі нақты іске асып, елді мекендердің инфрақұрылымын жақсартып отыр.
Қаржының ашық әрі тиімді жұмсалуының нәтижесінде Абай облысында су желілері белсенді түрде салынуда. 21 жобаның жүзеге асуы өңірдің көптеген ауылдары мен шағын аудандарын сапалы ауызсумен қамтамасыз етуге мүмкіндік береді. Бұл – тұрғындардың күнделікті тұрмысын жақсартып қана қоймай, өңірдің әлеуметтік-экономикалық дамуына да оң әсерін тигізетін бастама.
