Сәрсенбі күні №4 нашар еститін балаларға арналған мектеп—интернатында аймақаралық ғылыми — тәжірибелік конференция өтті. Ғылыми басқосудың басты тақырыбы – «Мүмкіндігі шектеулі балаларды рухани — адамгершілік бағытта тәрбиелеудің заманауи жолдары». Конференцияға еліміздің бірқатар облыстарынан және Ресейдің Барнауыл қаласынан мамандар қатысты.
{jcomments on}Конференцияны ұйымдастырудағы негізгі мақсат – мүмкіндігі шектеулі балаларға, оның ішінде есту қабілетінің кемістігі бар балаларға, рухани-адамгершілік тәрбие беруде дәстүрлі және заманауи әдіс — тәсілдерді қолдану арқылы өзекті мәселенің шешімін табу. Нашар еститін балаларға арналған № 4 мектеп — интернаты директорының оқу ісі бойынша орынбасары Меруерт Жұмашбекова талқыланар тақырыптың өте үлкен мәнге ие екенін айтады. Сондай-ақ ол аймақаралық ғылыми — практикалық конференцияның нәтижесі бойынша атқарылатын жұмыстар жайлы мағлұмат беріп өтті.
— Конференцияның қорытындысы арнайы дөңгелек үстелде шығарылады. Содан кейін ғылыми баяндамалардың мәтіні жинаққа енгізіліп жарияланады. Қатысушыларға сертификаттар табысталады,- дейді Меруерт Қылышбекқызы.
Ғылыми-тәжірибелік конференцияда алға қойылған бірнеше міндеттер болғанын да айта кеткен жөн. Олардың арасында мүмкіндігі шектеулі балаларға рухани — өнегелік тәрбие беруде тәжірибелік бағыт пен жаңашыл инновациялық ойлар жиынтығын қалыптастыру, есту кемістігі бар оқушыларды жүйелі іскерлік негізінде рухани — өнегелік бағытта тәрбиелеу міндеттерінің жаңашыл модельдері мен механизмдерін анықтау бар. Сондай-ақ арнайы педагогтарды мүмкіндігі шектеулі балаларға арнайы мектеп-интернаты жағдайында рухани-өнегелік даму мен тәрбие беруде өзекті ғылыми-әдістемелік талдаулар жасауға жұмылдыру, түзету ұйымдарының арнайы педагогтарына шығармашылық тұрғыдан дамуына жағдай туғызу, мүмкіндігі шектеулі балаларға рухани-өнегелік тәрбие берудегі арнайы білім ұйымдарындағы педагогтардың кәсіби біліктілігін арттыру міндеттері қойылған.
Конференция барысында, негізгі бөлігі басталмай тұрып, шақырылған меймандарға нашар еститін балаларға арналған №4 мектеп-интернатында балаларға рухани-адамгершілік тәрбие беру бағытында атқарылып келе жат-қан шаруалар жайлы хабардар ететін фильм көрсетілді. Осы ретте білім беру мекемесінде тәрбиеленушілердің жан-жақты дамуына жағдай жасалғанын айта кету керек. Мәселен, мектепте «Аққу» би студиясы, «Өнер» бейнелеу өнері студиясы, халық аспаптық ансамблі, «Сиқырлы ине», «Ағаштан ою» қолөнер үйірмелері, «Әдемі дауыс» вокал студиясы бес жылдан бері жұмыс істеп келе жатқан көрінеді. Соның бір нәтижесі ретінде шара аясында балалардың қолынан шыққан сан түрлі бұйымдар қойылған арнайы көрме ұйымдастырылды.
Аймақаралық ғылыми-практикалық конференцияға еліміздің Көкшетау, Қостанай, Петропавл, Павлодар, Өскемен, Риддер, Зырян қалаларынан және Барнауыл қаласынан арнайы мамандар мен мұғалімдер шақырылған болатын. Солардың бірі — Барнауыл қаласының өлкелік мектебі директорының тәрбие ісі жөніндегі орынбасары Наталья Ермакова. Өз сөзінде өткізіліп отырған шараның маңыздылығы жайлы былай деп пікір білдірді.
— Рухани-адамгершілік тәрбие беру әрқашан үлкен мәнге ие. Сондықтан конференцияда талқыланғалы отырған тақырып өзекті болып табылады. Осы мәселе бойынша әріптесте-рімізбен танысып, тәжірибе алмасуға мүмкіндік туғызған ұйымдастырушыларға алғысымызды білдіреміз, — дейді Наталья Ермакова.
Шара аясында, пленарлық отырыстан бөлек, бірнеше тақырыптық алаңда басқосулар ұйымдастырылып әрқайсысында мүмкіндігі шектеулі балаларды рухани-адамгершілік бағытта тәрбиелеуге қатысты мәселелер қарастырылды.
Мирас ҚҰСАЙЫН,
«Семей таңы»
