Semeytany.kz — Абай облысының әкімі Берік Уәли бастаған өңір делегациясы Ресей Федерациясының Омбы қаласында ұйымдастырылған «Ертіс: достық өзені – даму өзені» атты VII халықаралық туристік-көліктік форумға қатысты.
Форумның негізгі өзегі – «Ресей – Қазақстан – Қытай» бағыты бойынша мультимодальды транзиттік дәліз қалыптастыру мүмкіндіктерін талқылау және осы бағытта Ертіс өзенінің әлеуетін тиімді пайдаланудың жолдарын қарастыру. Жиынға Ресей, Қазақстан және Қытайдың сарапшылары, мемлекеттік органдар өкілдері, кәсіпкерлер, кеме қатынасы мен көлік логистикасы саласының мамандары, сондай-ақ ғалымдар қатысты. Сонымен бірге Павлодар және Шығыс Қазақстан облыстарының басшылығы да форум жұмысына қатысқан.
Айта кетейік, биыл шілде айында Омбы облысы Үкіметі төрағасының орынбасары Андрей Шпиленко бастаған делегация Абай облысына арнайы сапармен келген болатын. Сол келіссөздердің нәтижесінде екі өңір арасында Ертіс өзенін дамыту және бірлесіп пайдалану жөніндегі хаттамаға, сондай-ақ 2025–2028 жылдарға арналған халықаралық және сыртқы экономикалық байланыстар жоспарына қол қойылған. Құжатта туризмді қамтитын бірқатар бірлескен жобалар да қарастырылған.
Омбыдағы форумның пленарлық отырысында сөз сөйлеген Берік Уәли аталған келісімдерді іске асыруға Абай облысы дайын екенін жеткізіп, өңірдің өндірістік және туристік мүмкіндіктеріне тоқталды. Ол Омбы облысының губернаторы Виталий Хоценкоға қонақжайлық танытып, жылы қабылдағаны үшін алғыс айтты. Сонымен қатар аймақ басшысы тарихи мұраны негізге ала отырып, трансшекаралық туристік маршруттар құруды, оларды ортақ брендпен халықаралық деңгейде ілгерілетуді ұсынып, мәдени байланыстарды күшейтуге қатысты бірқатар бастамаларды атады. Оның ішінде көрмелер мен фестивальдер ұйымдастыру, театрлар мен шығармашылық ұжымдардың гастрольдерін өткізу, сондай-ақ гидтер мен мәдени туризм мамандарын бірлесе даярлау және тәжірибе алмасу бағыттары бар.
Форум қорытындысында Берік Уәли мен Виталий Хоценко мәдениет саласындағы ынтымақтастық туралы келісімге қол қойды.
Өңірдің сыртқы экономикалық байланыстары да кеңейіп келеді. Биылғы үшінші тоқсан қорытындысына сәйкес Абай облысының Ресей Федерациясымен тауар айналымы 823,4 млн АҚШ долларын құраған. Бұл көрсеткіш өткен жылдың сәйкес кезеңімен салыстырғанда екі есеге жоғары. Қазіргі таңда облыста ресейлік капиталдың қатысуымен жұмыс істейтін 178 кәсіпорын бар.
Форум қарсаңында Абай облысының делегациясы Ертіс өзеніне арналған фотокөрмені, Омбы ұйымдарының иммерсивті шоуын, өңір дизайнерлерінің көрсетілімін және туристік көрмені тамашалады.
