Semeytany.kz — Абай облысының әкімі Берік Уәли өңір тұрғындарын Қазақстан Республикасының Тәуелсіздік күнімен құттықтап, бұл мерекенің ел тарихындағы айрықша орнына тоқталды.
Аймақ басшысы Тәуелсіздікті халқымыздың сан ғасырлық арманының жүзеге асуы, бірлік пен болашаққа бастар берік негіз ретінде бағалап, Қазақстанның осы жылдар ішінде бейбітшілік пен келісімді ту еткен, экономикасы нығайған және халықаралық деңгейде беделі артқан мемлекетке айналғанын атап өтті.
Құттықтауда Мемлекет басшысы Қасым-Жомарт Тоқаевтың Тәуелсіздік күнінің мән-маңызы туралы айтқан пікірі де сөз болды. Берік Уәлидің айтуынша, азаттық жолында күрескен ұлт перзенттерін ел жадында сақтау – қасиетті парыз, ал олардың отаншылдық рухы кейінгі буынға әрдайым үлгі болуы тиіс.
Сондай-ақ облыс әкімі тәуелсіздіктің қадірін арттыру, оны табысты әрі бақуатты мемлекеттің тірегі саналатын қастерлі құндылық ретінде сақтау – ата-баба аманаты әрі келер ұрпақ алдындағы борыш екенін жеткізді.
Өңір дамуына үлес қосып жүрген азаматтардың еңбегін ерекше атап өткен Берік Уәли облыстың әлеуметтік-экономикалық өсімі мен тұрғындардың өмір сапасының жақсаруы – бірлескен жұмыстың нәтижесі екенін айтты. Соңында жерлестеріне зор денсаулық, бақ-береке және толағай табыс тілеп, ел бірлігінің бекем болуын тіледі.
