Semeytany.kz — Бүгін Абай облысының әкімі Берік Уәлидің төрағалығымен әкімдік отырысы өтіп, 2025 жылдың қорытындысы бойынша облыстық бюджеттің атқарылу болжамы, ауыз сумен қамту барысы, ерекше қажеттіліктері бар адамдар үшін әлеуметтік нысандарды бейімдеу және инфрақұрылымды жақсарту жөніндегі жоспарлардың орындалуы қаралды.
Жиынға облыстық басқарма басшылары мен өңірлік департамент жетекшілері қатысып, аудан-қала әкімдері бейнережимде қосылды. Күн тәртібіндегі мәселелер бойынша қаржы басқармасының басшысы Гүлфайрус Серікболова, энергетика және тұрғын үй-коммуналдық шаруашылық басқармасының басшысы Раджан Сейтқанов, жұмыспен қамту және әлеуметтік бағдарламаларды үйлестіру басқармасының басшысы Айман Нұрлыбекқызы баяндама жасады.
1 желтоқсандағы мәліметке сәйкес, облыстық бюджет жоспары 122,7 пайызға орындалып, 19,4 млрд теңге игерілген. Ал қалалар мен аудандар 121,4 млрд теңгені игеріп, жоспарды 105,1 пайызға орындаған. Мемлекет басшысының халықты 100 пайыз ауыз сумен қамту жөніндегі тапсырмасына сай, биыл облыста осы бағытта 33 жоба жүзеге асырылып жатқаны айтылды.
Сонымен қатар ерекше қажеттіліктері бар азаматтарға қолжетімді орта қалыптастыру мәселесіне баса мән берілді. Ғимараттардың қолжетімділігі мүгедектігі бар адамдардың кедергісіз қозғалуына және қажетті қызметтерді алуына жағдай жасайтыны атап өтіліп, 2026 жылға 200 нысанды бейімдеу жоспарланып отырғаны жеткізілді.
Отырыста аймақ басшысы жауапты орынбасарларына, аудан-қала әкімдеріне және басқарма басшыларына 2025 жылға қаралған қаржыны толық игеруді қамтамасыз етуді, игерілу барысын жеке бақылауға алуды тапсырды. Сондай-ақ ауыз су жобаларының мерзімінде аяқталуын және әлеуметтік инфрақұрылым нысандарын бейімдеу жұмыстарын жандандыру қажеттігін айтты. Әкім нысандарды бейімдеу ісін тек мемлекеттік мекемелермен шектемей, жеке меншік нысан иелерімен де түсіндіру жұмыстарын күшейтіп, нақты орындалуын қадағалау керектігін ескертті.
