Semeytany.kz — Абай облысының әкімі Берік Уәли Парламент Мәжілісінің депутаты, әлеуметтік-мәдени даму комитетінің мүшесі, Жалпыұлттық социал-демократиялық партиясы (ЖСДП) фракциясының мүшесі Нұрлан Әуесбаевпен кездесті.
Кездесуге ЖСДП орталық аппаратының атқарушы хатшысы Нұрлан Жабаев пен партияның облыстық филиалының төрағасы Рүстем Сарманов та қатысты.
Жиында Мемлекет басшысы Қасым-Жомарт Тоқаевтың «Түркістан» газетінде жарияланған сұхбатында жүктелген міндеттерді іске асыру барысы талқыланды. Өңір басшысы облыста атқарылып жатқан жұмыстарға тоқталып, Президенттің қолдауымен басталған «Абайға құрмет» акциясы аясындағы игі бастамалар мен нақты жобаларды атап өтті.
Әкімнің айтуынша, өңірде инфрақұрылымдық мәселелерді шешуге басымдық беріліп отыр. Атап айтқанда, жылу, су және электр желілерін жаңғырту, жолдарды жөндеу, әлеуметтік нысандар салу, инвестиция тарту сияқты бағыттар қатарында ауыл шаруашылығы, туризм және кәсіпкерлікті дамыту жұмыстары да күшейтілмек.
Өз кезегінде Нұрлан Әуесбаев Абай облысының жаңадан құрылған аймақ екенін еске салып, денсаулық сақтау мен мәдениет салаларындағы өзекті түйткілдерге назар аударды. Сондай-ақ Семей ядролық сынақ полигонының зардаптарын жоюға қатысты мәселелерді көтеріп, алдағы уақытта бұл тақырыптарды тиісті министрліктерге депутаттық сауал ретінде жолдауға дайын екенін білдірді.
Мәжіліс депутаты жұмыс сапары аясында өңірдің әлеуметтік сала және орман шаруашылығы қызметкерлерімен кездесіп, бірқатар маңызды нысандарды аралауды жоспарлап отыр.
