Semeytany.kz — Абай облысында жол инфрақұрылымын жаңарту жұмыстары жүйелі түрде жалғаса береді. Бұл туралы облыс әкімі Берік Уәлидің төрағалығымен өткен 2026 жылғы алғашқы кеңейтілген аппараттық кеңесте айтылды. Жиында облыстық және жергілікті маңызы бар автомобиль жолдарын дамыту жоспарлары, сондай-ақ облыстық басқармалар мен қала-аудандардың 2025 жылғы бюджетті орындау барысы қаралды.
Кеңесте жолаушылар көлігі және автомобиль жолдары басқармасының басшысы Мерей Байырхан және қаржы басқармасының басшысы Гүлфайрус Серікболова баяндама жасады. Мәліметке сәйкес, облыста автомобиль жолдары мен елді мекен көшелерінің жалпы ұзындығы 10 мың шақырымнан асады. 2025 жылдың қорытындысы бойынша жергілікті маңызы бар жолдардың 89 пайызы нормативтік жағдайға жеткізілген.
Өткен жылы республикалық маңызы бар жолдардың 584 шақырымы қайта жаңғыртылып, 258 шақырым жолда орташа жөндеу жүргізілген. Ал биыл республикалық жолдардың 288 шақырымын қамтитын бірқатар учаскеде жөндеу жұмыстарын жалғастыру жоспарланып отыр.
Жергілікті жолдар мен көшелер бойынша да қарқын бәсеңдемейді. 2025 жылы 325 шақырым жол жаңартылса, 2026 жылы 205 шақырымнан астам жолды жөндеу көзделген. Семей қаласында көше-жол желілері мен аулаішілік жолдарды жаңғыртуға, жаяу жүргіншілер жолдарын реттеуге және қиыршық тас төсеу жұмыстарына басымдық берілмек.
Қазір Семей қаласындағы ірі автокөлік көпірінің, сондай-ақ Ақсуат және Көкпекті аудандарындағы көпірлердің құрылысы жалғасып жатыр. Ал Аягөз және Жарма аудандарындағы бірнеше көпірді қайта жаңғырту бойынша жобалық-сметалық құжаттамалар әзірленуде.
Аймақ басшысы салаға жауапты басқармаға жергілікті және республикалық маңызы бар жолдардың жағдайын жақсарту, жөндеу жұмыстарының тиімділігін арттыру, Семей қаласындағы көпір жобасын белгіленген мерзімде аяқтау және қаржыландыру мен мердігерлердің жұмысын қатаң бақылауда ұстауды тапсырды. Сондай-ақ, Семей қаласының әкіміне көшелер мен аулаларды жөндеуге қатысты нақты ұсыныстар енгізу міндеті жүктелді.
«Жол инфрақұрылымын дамыту – тек салалық мәселе емес, өңір экономикасының, тұрғындардың қауіпсіздігі мен өмір сапасының негізгі көрсеткіші. Сондықтан бұл бағыттағы жұмыстар тұрақты бақылауда болады», – деді Берік Уәли.
Кеңесте бюджет мәселесі де назардан тыс қалмады. Қаржы басқармасының мәліметінше, 2025 жылы облыстың бюджет кірістері жоспардан асып, 105,8 пайызға орындалған. Бұл көрсеткіш өткен жылдың есепті кезеңімен салыстырғанда 21 пайызға өсімді (121%) көрсетеді. Облыс әкімі бюджет қаражатын толық әрі уақытылы игеру үшін талдамалық жұмысты күшейтуді, тәуекелдерді басқару тетіктерін жетілдіруді және жобалық-сметалық құжаттамалар мен сатып алу рәсімдерінің мерзімінде орындалуын қамтамасыз етуді тапсырды. Жыл қорытындысы бойынша қаржыны толық игермеген басқармалар мен әкімдердің жауапкершілігі қаралатыны да ескертілді.
«Мемлекеттік қаражат – бұл халықтың сенімі. Сол себепті біз қаржының қаншалықты игерілгенін ғана емес, оның нақты қандай нәтиже бергенін де, яғни сапасын да бағалауымыз қажет. Біздің басты мақсатымыз – халықтың тұрмыс сапасын жақсартып, қолайлы жағдай жасау», – деді облыс әкімі.
