Semeytany.kz — Мемлекет басшысы Қасым-Жомарт Тоқаев былтыр өз тапсырмасымен 2030 жылға дейін аймақтарды дамыту тұжырымдамасы бекітілгенін айтып, басты мақсат өңірлер арасындағы әлеуметтік-экономикалық алшақтықты азайтып, халықтың әл-ауқатын арттыру екенін мәлімдеді.
Президенттің сөзінше, өткен жылғы даму қорытындысы аймақтар экономикасының тұрақты өсіп келе жатқанын көрсеткенімен, шешілмеген түйткілдер әлі де бар. Соның бірі – инфрақұрылым мәселесі. Қазіргі таңда аймақтардың инфрақұрылыммен қамтылу деңгейі орташа есеппен 64,1 пайызды құрайды, алайда бұл көрсеткіш өңірлер бойынша біркелкі емес, айтарлықтай айырмашылық бар.
Мемлекет басшысы қажетті инфрақұрылымның жетіспеуі облыстардың дамуына да, халықтың тұрмыс сапасына да кері әсер ететінін атап өтті. Әсіресе жаңадан құрылған Абай және Ұлытау облыстарында инфрақұрылым жеткіліксіз екені айтылды. Сонымен бірге Алматы облысындағы ахуалдың да көңіл көншітпейтіні, аталған өңірлердің дамуына ерекше назар аудару қажеттігі қадап көрсетілді.
Тоқаев аймақ басшыларына экономиканы әртараптандыруға және азаматтардың табысын арттыруға баса мән беруді тапсырды. Сондай-ақ инфляцияны төмендетуге бағытталған тиімді шаралар қабылдап, сапалы инвестиция тарту, шағын және орта бизнесті күшейту арқылы жаңа жұмыс орындарын ашу қажет екенін жеткізді.
