Аудандық Мәдениет үйінде аудан әкімі Серік Зайнулдиннің қатысуымен өңірімізге қарасты барлық шаруа қожалықтары мен серіктестіктер басшыларының басын қосқан жиын өтті. Басқосуға өзек болған негізгі тақырып — «Суармалы жерлерді тиімді пайдалану» жөнінде келелі әңгіме өрбіді.
{jcomments on}Облыс әкімі Даниал Ахметовтің тапсырмасы бойынша, әрбір ауылдық округтерде суармалы жерлерді пайдалану реттілігі, оның қаржыландырылуы, тиімді игерілуі, өңделуі мен суару әдістеріне және алдағы дамуына талдау жасау тапсырылған болатын. Сонымен қатар көзделген тағы бір міндет — суармалы алқапты тиімді пайдаланбай отырған жер игерушілермен арадағы келісімшартты бұзып, телімдерді мемлекетке қайтарып алу және жер қорын қалыптастырып, инвестициялық жобаларды іске асыратын ірі жер пайдаланушылар құзырына беру де меже етілген-ді.
Осы орайда өткен 2014 жылдың қорытындысы бойынша Үржар ауданында суармалы жерлерді игеру барысы туралы аудан әкімінің орынбасары Ж.Байсабыров арнайы баяндама жасады.
Ол өз сөзінде бүгінде Үржар ауданы бойынша 196 мың гектар егістік жер, оның ішінде 43 мың гектар суармалы алқап бар екенін атап өтті. Оның 25 мың гектары 716 шаруа қожалығына, ал 13770 гектары 11 жеке шаруа серіктестіктеріне бекітіліп берілгенін айтып, облыс әкімінің тапсырмасын орындау мақсатында және аудан әкімінің тапсырмасына сәйкес, пайдаланылмай жатқан суармалы жерлерді инвесторларға беруге бағытталған жұмыстардың нәтижелі жүргізіліп жатқанын сөз етті.
Жиын соңында сөз алған аудан әкімі Серік Зайнулдин бұл бағыттағы бірқатар мәселелерге баса тоқталып өтті.
— Құрметті жерлестер, Үржар ауданы — жер көлемі мен халқының саны жағынан облысымыз бойынша ең үлкен аудан. Суармалы жерлерді тиімді пайдалану мақсатында бұрынғы кеңестік дәуірден кейін ешбір магистральды каналдарға жөндеу жұмыстары жүргізілмеген. Сол себепті біздің ауданға Үкімет тарапынан үлкен қаржы бөлінуде. Облыс әкімінің тапсырмасы бойынша суармалы жерлерді тиімді пайдаланып, әр гектардан 35-40 центнерден дәнді дақыл алатындай жағдайға жеткізуіміз керек. Сонымен қатар сауынды сиырлы фермалар ашу және оны ары қарай дамыту мәселесі де кезекте тұр.
Ал келер 2016 жылы «Қасқа», «Қусақ» және «Келдімұрат» магистральды каналдарының жөндеу жұмыстары аяқталады. Алайда туындап отырған бір мәселе — көптеген азаматтар өздерінің жер телімдерін тиімсіз пайдаланады, жер көлемдері шағын, минералды тыңайтқыштар мен гербицидтерді қолданбайды. Бір сөзбен айтқанда, бекітіліп берген жерлер дұрыс пайдаланылмайды. Енді тек еңбек етіп, жаңа технология енгізіп, ауданға инвестиция тартып жұмыс жасаймыз деген шаруашылықтарға көмектесуге дайынбыз.
Алдағы уақытта барлығымыз бір жағадан бас, бір жеңнен қол шығарып, бірлесе жұмыс жасап, жақсы нәтижеге қол жеткіземіз деп сенемін, — деді аудан әкімі.
Жиын қорытындысында кеңес барысында қозғалған мәселелерді алдағы уақытта тиімді шешу бағытында бірқатар алғышарттар қабылданды.
Бауыржан ЖАҚЫП,
«Семей таңы»