Семей қаласының Балалар мен жастардың шығармашылық сарайында «Жастар шығармашылығы, ЭКСПО – 2017 балалар көзімен» атты техникалық көрме-сайысы өткізілді. Аталмыш көрмеден жас өнертапқыштардың 500 – ге тарта туындысы орын алды.
Көрме қалалық білім бөлімінің қолдауымен ұйымдастырылды. Оның негізгі мақсаты балалардың ғылыми-техникалық салаға деген қызығушылығын әрі олардың шығармашылық әлеуетін арттыру болып табылды. Экспозицияға түрлі бағыттағы шығармашылық үйірмелердің жекелей және топтық жұмыстары қойылған екен. Көрме екі бөлімнен тұрады. Атап айтқанда, техникалық және сәндік қолданбалы жұмыстар. Қалалық білім бөлімі басшысының орынбасары Наталья Тегайдың айтуынша, мұндай көрмелер оқушылардың шығармашылық қабілетін дамытып қана қоймай, сонымен қоса баламалы қуат көздерін табуға жол ашпақ.
— Бүгінгі көрмеге шамамен 500-ге жуық туынды қойылып отыр. Осы бағыттағы шаралар 2 жылда бір рет ұйымдастырылады. Мұндай сайыстар оқушылар үшін сөзсіз қажет. Себебі оқушылар өздерінің тың идеяларын жүзеге асыру арқылы аймағымыздың өркендеуіне үлестерін қосады. Бұған қоса олар өз жетістіктерін күнделікті тұрмыстық өмірге енгізуге мүмкіндік алады. Балалар осы сайысты асыға күтті. Кейбірі өз шығармашылық еңбектерін жасауға екі жылдай уақыттарын жұмсады. Сондықтан да бүгінгі шара оқушылар үшін өте айрықша маңызға ие. Уақыт өткен сайын бұл көрмеге деген қызығушылық артып келеді. Айта кетерлігі, қатысушылардың да саны өсу үстінде. Ұсынылған жұмыстардың сапасы да көз қуантарлықтай. Үздік жұмыстар балалар шығармашылығына арналған республикалық энциклопедиялар мен қаладағы мұражайларға жіберіледі. Көптеген туындылар баламалы қуат тақырыбына арналып отыр. Осыған қарап балалардың өңір экономикасын дамытуға әзір екендіктерін байқауға болады,- дейді Наталья Владимировна.
Байқауға өз жұмысын алып келген қатысушылардың бірі — №11 орта мектептің оқушысы Дмитрий Измайлов. Оның модельдерді құрастырумен айналысқанына төрт жылдай уақыт өтіпті. Осы аралықта Дмитрий талай жарыстарға қатысып үлгерген. Келешекте жас өрен еліміздегі авиация саласын дамытып, қауіпсіз ұшақтарды жасап құрастырғысы келетінін айтып берді.
— Басында ермек үшін айналысқан едім. Кейін осы модельдерді құрастыруға ерекше ықыласым ауды. Өз ұстаздарыма ал-ғысымды білдіремін. Бірнеше жұмыстарым осы көрмеге қойылып отыр. Бұл жерге модельдерді әкелудегі мақсатым — ұшақтарға енгізілген инновациялық техноло-гиялардың қауіпсіздігі мен тиімділігін қалың жұртшылыққа көрсету. Егер де болашақта ел авиациясы менің әдістерімді қолданып жатса, мен үшін одан асқан бақыт болмас еді,- деген ойымен бөлісті жас өнертапқыш.
Жақсылық МҰРАТҚАЛИҰЛЫ,
«Семей таңы»
