Semeytany.kz — Абай облысының әкімі Берік Уәлидің төрағалығымен өткен инвестиция тарту жөніндегі өңірлік үйлестіру кеңесінің кезекті отырысында жалпы құны 54 млрд теңгеден асатын жеті ірі жоба таныстырылды. Жобалар өңірдің өнеркәсіп, ауыл шаруашылығы, логистика және туризм салаларын дамытуға, жаңа өндірістер ашуға және жұмыс орындарын көбейтуге бағытталған.
Отырыста ұсынылған бастамалар Семей қаласында, Жарма, Жаңасемей, Бородулиха және Аягөз аудандарында жүзеге асырылмақ. Инвесторлар гастро-парк ашу, ағаш өңдеу бағытындағы өнеркәсіптік парк салу, дәнді дақылдар мен күнбағысты тамшылатып суару технологиясымен өсіріп, оны әрі қарай қайта өңдеу, теріні өңдеу негізінде жемдік қоспа шығару, қойма логистикасын дамыту, қонақүй кешендерін салу сияқты бірқатар бағытты қамтитын жобаларын ұсынды. Бұл бастамалар толық жүзеге асқанда мыңнан астам жаңа жұмыс орны ашылады деп жоспарлануда.
Аймақ басшысы таныстырылған жобалардың облыстың әлеуметтік-экономикалық дамуына елеулі ықпал ететінін атап өтті. Оның айтуынша, жаңа өндірістерді қысқа мерзімде іске қосу және инвесторларға қолайлы жағдай жасау – жергілікті атқарушы органдардың басты міндеттерінің бірі. Осы мақсатта облыстық, қалалық және аудандық деңгейдегі әкімдіктер тарапынан жан-жақты қолдау көрсетілетіні айтылды.
Биылғы жылдың басынан бері өңірде іске асырылып жатқан инвестициялық жобалардың саны 29-дан 97-ге дейін өскен. Тартылған инвестиция көлемі 2,2 трлн теңгеден 3,5 трлн теңгеге дейін ұлғайып отыр. Оның ішінде 50 жоба Ұлттық цифрлық инвестициялық платформаға енгізілген. Бұл көрсеткіштер Абай облысында инвестициялық белсенділіктің артып келе жатқанын айғақтайды.
