Семей қаласындағы Т.Аманов атындағы №16 жалпы орта білім беретін мектепте «ҰБТ-ға дайындық барысы. Мамандық таңдау» тақырыбында дөңгелек үстел ұйымдастырылды. Оған қалалық білім бөлімінің басшылығы, ата-аналар және қала мектептерінің 11-ші сынып оқушылары қатысты.
Дөңгелек үстелді өткізудегі негізгі мақсат мектеп түлектеріне ҰБТ талаптарын түсіндіру әрі мамандықты дұрыс таңдауға бағыт – бағдар көрсету болып табылды. Сондай-ақ басқосуда ҰБТ-да жиі орын алатын қателіктер жайлы айтылып, олардың алдын алудың жолдары қарастырылды. Көпшілік алдында сөз алған қалалық білім бөлімінің басшысы Наталия Фесенко биылдан бастап тестілеу сынағына енгізілген өзгерістерге тоқталды.
— Биыл шекті деңгейге жете алмаған түлектерге ҰБТ-ны екінші мәрте тапсыруға мүмкіндік берілетін болады. Алайда оның нәтижесі бойынша жиналған балл аттестатқа қойылмайтынын ескеру керек. Аттестаттың бағалары алғашқы тестің қорытындысы негізінде шығарылады. Ал сынақты қайта тапсыру — тек жоғары оқу орнына түсуге қажетті балды жинау үшін жасалған мүмкіндік. Бұған қоса, оқушы екі алған жағдайда, оған сынақтан қайта өтуге рұқсат берілмейді. Ол тек мектепте дәстүрлі емтиханды тапсыру арқылы ғана бағасын ретке келтіре алады. Тағы да бір айта кетерлігі, мұның алдында республикалық әрі халықаралық олимпиадалардың жүлдегерлері тестілеу кезеңінен босатылатын еді. Енді, ҚР Білім және ғылым министрлігінің ұйғарымына сәйкес, мұндай жеңілдік тек білім байқаулары мен түрлі сайыстардың жеңімпаздарына ғана жасалады,- деді Наталия Анатольевна.
Сонымен қатар білім бөлімінің басшысы өткен жылы ҰБТ-да тіркелген заңға қайшы әрекеттерді тілге тиек етіп, биылғы мектеп түлектерін тестілеу байқауының талаптарын мейлінше қатаң ұстануға шақырды.
— Өздеріңізге мәлім, былтыр бірнеше мектеп бітірушілердің ата-аналарына беймәлім тұлғалар белгілі бір мөлшердегі қаражатқа жоғары балл алып беруге уәде еткен екен. Бірақ тестілеу кезінде барлығы керісінше болып шықты. Тестке берілген уақыттың сырғып өтіп жатқанына қарамастан, балалар еш әрекетсіз отыра беріпті. Олар сырттан дұрыс жауаптар нұсқасы келетініне еш шүбә келтірмеген. Көмектесуге уәде бергендер тиісті қаражаттарына ие болғаннан кейін іздерін суытып үлгерген екен. Нәтижесінде оқушылар қапыда қалды. Кейбірі тіпті бірде-бір балл жинай алмай, аттестат алу мүмкіндігінен айырылды. Бұл әуелі ата-аналардың өрескел қателігі. Мұндай алаяқтардан сақ болған жөн. Күмәнді азаматтарға сенуден аулақ болыңыздар. Сондықтан ҰБТ-ны ұстаздарыңыздың берген білімі мен ақыл-кеңесіне сүйене отырып тапсырып шыққан дұрыс болатыны даусыз,- деп түйіндеді өз сөзін білім бөлімінің басшысы.
Жақсылық МҰРАТҚАЛИҰЛЫ,
«Семей таңы»
