«Нұр Отан» партиясы Семей қалалық филиалының мәжіліс залында партия жанындағы жемқорлықпен күрес жөніндегі қоғамдық кеңестің кезекті отырысы өтті. «Нұр Отан» партиясы Семей қалалық филиалы жанындағы жем-қорлықпен күрес жөніндегі қоғамдық кеңестің төрағасы Ғаббас Ибраевтың жетекшілігімен өткен жиынға жергілікті билік өкілдері, құқық қорғау органдары, кәсіпкерлер палатасы, үкіметтік емес ұйымдардың өкілдері қатысты.
Кеңес отырысында Ғаббас Ибраев «Нұр Отан» партиясы Семей қалалық филиалы жанындағы жемқорлықпен күрес жөніндегі қоғамдық кеңестің құрамының артқанын атап өтті. Ол кеңес құрамына жаңадан жас кәсіпкер Руслан Кепке мен «Жас Отан» жастар қанатының мүшесі, Семей қаласының 2015 жылғы үздік студенті Данияр Манарбековтің кіргенін жеткізді. Жиын барысында алғашқы болып сөз алған Семей қаласы жұмыспен қамту және әлеуметтік бағдарламалар бөлімінің жетекші маманы Әлия Қалиева сыбайластықтың алдын алу іс-қимылы және жемқорлыққа қарсы ҚР заңының аталмыш бөлім жұмысында жүзеге асуы жөнінде баяндады. Әлия Қалиеваның сөзіне сүйенсек, 2016 жылдың 1 сәуіріндегі жағдай бойынша, қалалық жұмыспен қамту және әлеуметтік бағдарламалар бөлімінде жемқорлыққа қатысты ешқандай құқық бұзушылық тіркелмеген. Дегенмен сыбайластықтың алдын алу мен жемқорлыққа қарсы күрес мәселесіне жіті назар аударылуда. Бүгінде мекемеде азаматтарға арналған арнайы жәшік қойылып, арыз-шағымдар үшін шұғыл желі жұмыс істейді.
Кеңес отырысында Шаған кентінің әкімі Талғат Құмаров сыбайластықтың алдын алу іс-қимылы және жемқорлыққа қарсы заңының ауылдық округтер мен кенттерінде орындалуы туралы баяндады. Жиын соңында қаламыздағы автокөлік жолдарын жөндеу мен күтіміне жүргізілген жұмыстар туралы тұрғын үй-коммуналдық шаруашылығы, жолаушылар тасымалы және автокөлік жолдары бөлімі басшысының міндетін атқарушы Нұрлан Серғазинов баяндады. Оның айтуынша, 2013 жылы жөндеуден өткізілген жолдардың әлі де кепілдік міндеттері аяқталмаған. Дегенмен, жүргізілген арнайы сараптама барысында анықталғандай, сол жылдары жөндеу жүргізілген жолдардың сапасы сын көтермейді. Кездесу барысында атап өтілгендей, аталмыш жолдарды, негізінен, мердігер мекеме «Семей жолдары» ЖШС жөндеуден өткізген. Енді мамыр айының 7-ші жұлдызына дейін мердігерлерге аталмыш көшелердегі жіберілген кемшіліктерді өз қаражаттары есебінен қалпына келтіру керек болады.
Бұл жұмыстардың атқарылу барысы мен атқарылған жұмысты қорытындылайтын арнайы жұмыс тобы құрылғанынан құлағдар еткен Нұрлан Серғазинов биылғы жылы ағымдағы жөндеу жұмыстарына бөлінетін қаржы көлемі артып, 200 млн. теңге қарастырылып отырғанын жеткізді. Бұл қаражат өз кезегінде 48 мың шаршы метр аумақтан астам жерді жөндеуге мүмкіндік береді екен.
Бұдан өзге осы жылы 30 мың шаршы метр жарылған жолдарды жөндеуге де қосымша қаражат қарастырылып отыр. Тағы бір жаңалық — ағымдағы жылы алғаш рет жолдарды жаз маусымында ұстап тұру мақсатында жұмсалатын қаржыға қосымша 56 млн. теңге көлемінде қаражат қарастырылған.
ТҮКШ, жолаушылар тасымалы және автокөлік жолдары бөлімі басшысының міндетін атқарушы Нұрлан Серғазиновтың қорытынды сөзінен кейін «Нұр Отан» партиясы Семей қалалық филиалы жанындағы жемқорлықпен күрес жөніндегі қоғамдық кеңестің төрағасы Ғаббас Ибраев жол мәселесіне келгенде қатаң талаптардың сақталуы керектігін баса айтты. Ол әсіресе жауапсыз мердігерлерді жол жөндеу жұмыстарына жібермеуді қадағалап, ал атқарылған жұмыстарды көз жұмып қабылдап алған лауазымды тұлғаларды қатаң жауапқа тарту керектігін атап өтті. Кеңес төрағасы сондай-ақ аталмыш келелі мәселенің алдағы кеңес отырысында жеке қаралатынын жеткізді.
Асан МЫРЗАХАН,
«Семей таңы»
