Жарма ауданындағы асыл тұқымды ірі қара өсірумен атағы алысқа кеткен Жарық ауылдық округінде Ойсылқара тұқымын өсіріп, өңірге тың серпіліс әкеліп отырған азаматтар бар. Осыдан бес жыл бұрын түйе өсіруді қолға алған «Дайана» шаруа қожалығының басшысы Еркін Тектеновтің түйелері бүгінде Қалба тауының сілемінде жайылымда жүр. Төрт түліктің төресін әкеліп, кәсібін жаңа қырынан дамытуға бет алған Еркін Тектеновтің шаруашылығына аудан әкімі Нұрлан Сыдықов арнайы барды.
Нұрлан Бәтташұлы ауылдық округке сапары барысында ең алдымен округке қарасты Малай ауылындағы жергілікті негізгі мектептің жағдайымен танысты. Қырық бала білім алатын мектеп ғимаратының бұл күнде тозығы жеткен. Ғимарат төбесін күрделі жөндеуге шешім қабылданып, тиісінше қаржы да бөлінген. Аудан әкімі мектеп әкімшілігінен жөндеу жұмыстарының сапалы жүргізілуін ерекше қадағалап, оқушылар санын барынша арттыруға мән беруді талап етті. Алдағы уақытта білім ошағының сырт келбетін жөндеу, терезелерін ауыстыру жағын да ескеруді тапсырды. Сонымен қатар білім ордасына келген жас мамандармен тілдесіп, еліміздің ертеңін қалыптастыру білім ошағынан бастау алатындықтан, оқушыға сапалы білім мен саналы тәрбие беру ұстаздар қауымына жүктелген міндет екенін атап өтті.
«Дайана» шаруа қожалығына арнайы келген Нұрлан Бәтташұлы Ойсылқара тұқымының жайымен жайылым басында қанықты. Түйелер бүгінде Қалба сілеміне төселген, өңірдің табиғатын жатсынбапты. Шаруа қожалығының басшысы Еркін Тектенов Ойсылқара тұқымын Жарма ауданына қайта әкелу оңайға түспегендігін айтады. Ол бұл істі қолға алмай тұрып Оңтүстік пен Батыс Қазақстандағы түйе өсіруші шаруалармен кездесіп, шаруаның қыр-сырын меңгергеннен кейін ғана мұндай қадам жасауға бел буған. Осылайша, бес жыл бұрын бұл іс қолға алынып, Оңтүстік Қазақстан облысынан 25 түйе әкелінген. Алғашқы жылдары бейтаныс кәсіпті игеріп кетудің өзіндік ауыртпашылығы болғанын да жасырмады. Тіптен түйе көрмеген өзге түліктер үркіп, ал Қамбар ата тұқымы қыр асқан жағдайларды да еске алады.
— Айрықша күтімді қажетсінбейтіндіктен «кедейдің малы» атанған жануар табиғи жайылымда тез қоңданады. Әрі оның сүті мен шұбатының медицина тарапынан емдік сусын ретінде мойындалғаны да белгілі. Көзін тауып өңдей білсе, жүні де өнеркәсіпте таптырмайтын шикізат. Бүгінгі таңда осы ісімізді одан әрі дамытуға күш салып жатырмыз,- дейді шаруашылық басшысы Еркін Тектенов.
Қазір шаруа қожалығында 130-ға тарта түйе бар. Түліктің аузы көкке тиіп, боталарының тірсегі қатқанда, сауын жұмыстарын қолға алмақ. Сауын кезінде орташа есеппен тәулігіне 70 литр саумал алынады екен. Ал өндірілген шұбат аудан жұртшылығының сұранысынан аспайды.
Шаруа қожалығының басшысының айтуынша, биыл қосымша тағы да 100 бас ақ түйе әкелу көзделуде. Екі жылда бір төл беретін түйені көбейте отырып, болашақта осындағы Ойсылқара тұқымын бес жүзге жеткізу ойларында бар. Түйе санын көбету арқылы шұбат өндірісін қолға алу да болашақтың жоспары. Қыстамадағы қораларын қайта жарақтап, түйелердің еркін қозғалуын қамтамасыз ету жағы да бар. Шаруа қожалығының жұмысымен арнайы танысуға келген аудан әкіміне Еркін Тектенов мемлекеттен жеңілдетілген түрде жаңа техникалар алуға ниетті екенін де айтты.
Жалпы, жаңаша жұмыс бастап, ісін ілгері бастырған шаруашылықты көрген аудан әкімі қожалық жұмысын жоғары бағалап, түйе шаруашылығын дамытуға жергілікті атқарушы билік те ынталы екенін жеткізді. Нұрлан Бәтташұлы, алға қойған кешенді жұмыстар жүзеге асса, ауданда түйе шаруашылығының кең өріс алатындығына сенім білдірді. Негізінен, Оңтүстік өңірлерден тасымалданатын жанға шипа беретін шұбаттың ауданда өндірілуі облыс нарығына еркін шығуға қолайлы екенін де аудан әкімі тілге тиек етті. Ал жеңілдікпен ауылшаруашылық техникаларын алу мәселесін қарастыруды аудандық ауыл шаруашылығы және кәсіпкерлік бөлімінің басшысы Дастан Танановқа тапсырып, барынша қолдау жасау қажеттігін жеткізді.
Мейірхан ОСПАНБАЕВ,
«Семей таңы»
