Семей қаласының «Жас Отан» жастар қанатының белсенділері «Мейірім шуағы» атты қайырымдылық кешін өткізді. Қалалық Мәдениет сарайында өткен қайырымдылық концерті Семей қаласының тұрғыны Жаннұр Жұмагелдинаның еміне қаражат жинау мақсатында ұйымдастырылды.
Жаннұр Жұмагелдина туа бітті сал ауруына шалдыққан. Анасы Астана қаласындағы нейрохирургия орталығына ота жасатуға апаруды көздеп отыр. Алайда қаржы тапшылығы қолбайлау болуда. Сондықтан да Майраш Жұмагелдина жастарға көмек сұрай келіпті. Жалғыз басты ананың тілегін жасотандық жастар жерде қалдырмай, қайырымдылық акциясын ұйымдастыруды ұйғарыпты.
— Жаннұрға қазір денсаулығын жақсарту керек. Сондықтан біз 100 мың теңгедей қаражат жинап, анасына табыс еттік. Біз Жаннұрдың үйінде болдық, жақындарымен әңгімелесіп, оның тез сауығып кетуіне тілектестік білдірдік,- дейді «Жас Отан» жастар қанатының төрағасы Айдос Тулеуханов.
Мұндай қайырымдылық акциясын жастар алғаш рет өткізіп отырған жоқ. Өткен жылы олар балалардың еміне қаржы жинау мақсатында бірқатар шаралар ұйымдастырыпты. Өкініштісі – әзірге акцияны студент жастардан өзге қолдаушылар табылмай отыр. Дегенмен жастар Жұмагелдиндер отбасына қол ұшын созатын азаматтардың табылатынына сенімді. Ал Жаннұрдың анасы акция ұйымдастырып, қайырымдылық жасаған жастарға ризашылығын білдірді.
— «Жас Отан» жастар қанаты белсенділеріне, студенттер қауымына алғысымды білдіремін. Жиналған қаражатпен Жаннұрды квота арқылы Астана қаласындағы нейрохирургия орталығына ота жасатуға апарғалы отырмын. Жаннұр аяғынан тік тұрып кетпесе де, дертіне біраз ем бола ма деген үміттемін. Біз медициналық көмек аламыз, мемлекеттен жәрдемақы алып отырмыз. Барлық қаражат баламның емі мен дәрі-дәрмегіне жұмсалады. 2014 жылы кезек бойынша Энергетик ықшам ауданынан бір бөлмелі пәтер алдық. Бүгінде ол жерде қызым екеуіміз тұрып жатырмыз. Қолғабыс жасаған жергілікті атқарушы билікке де алғысымыз зор,- дейді Майраш Жұмагелдина.
Жасотандықтар мүмкіндігі шектеулі жандарға, әртүрлі дертке шалдыққан балаларға қолдау көрсету тек мемлекеттің ғана емес, жалпы қоғамның да міндеті екенін айтады. Сондықтан да олар кәсіпкерлердің, қоғамдық ұйымдар мен қайырымдылық танытқысы келетін кез келген азаматтың жастар ұйымына жүгінуіне болатынын жеткізді.
А. САМАТҰЛЫ, Семей қаласы.
