Семейдегі Достық үйінде қалалық әжелер сайысы өтті. Тағылымды шара ҚР Тәуелсіздігінің 25 жылдығы мен 1 Мамыр — Қазақстан халқының бірлігі күніне орай ұйымдастырылды. Сайысты өткізудегі басты мақсат – әжелеріміздің өнері, үлгі-өнегесі арқылы жастарды ұлттық салт-дәстүрге тәрбиелеу әрі қоғамдағы ананың мәртебесін көтеру. Сайыстың өтуіне қалалық Достық үйіндегі «Айша бибі» қазақ мәдени орталығы ұйытқы болыпты. Ал сайысқа оннан аса әже қатысуға ниет білдірген. Өнер сайысы 4 кезеңнен тұрды. Оның барысында қатысушылар өзі және өзінің жанұясы туралы ақпаратпен бөлісіп, ұлттық салт-дәстүрлерге қатысты сұрақтарға жауап бере отырып, көрерменге өз өнерлерін паш етті.
— Сайыскерлеріміз өте жақсы дайындықпен келгенін байқатты. Олар-дың дені түрлі салада ұзақ жылдар еңбек еткен зейнеткерлер. Байқау кезінде әжелеріміз әділ қазылар алқасы мен көрермендер назарына ұмытылған салт – дәстүрлерді ұсынды. Қарттарын қадірлей білген қазыналы ел екеніміз белгілі. Халқымыздың кейуаналары қай заманда болмасын өздерінің ақыл-парасатымен ерекшеленетін. Қазақтардың өмірінде ананың алар орны ерекше. Бүгінгі қатысушыларымыз өскелең ұрпаққа үлгі болады деп сенемін. Олар ұмыт болған құндылықтарымызды жаңғыртып, жастарға көрсетіп, салт-дәстүрлерімізді үйретуге күш салады. Осы шараның нәтижесінде үздік шыққан әжелеріміз алғыс хаттар мен арнайы сыйлықтарға ие болады. Жастар үшін тәлім — тәрбиесі мол осындай шараларды ары қарай жалғастыруды көздеп отырмыз,- дейді «Айша бибі» қазақ мәдени орталығының жетекшісі Айман Боқбасарова.
Осы өнер жарысына бәсекеге түсу үшін емес, керісінше, жас ұрпақпен өзінің өмірдегі көрген-білгенін бөлісуге келген қатысушылардың бірі — Роза Исақызы. Ақ жаулықты ана 40 жылдай ғұмырын ұстаздық салаға арнапты. Бүгінде зейнеткерлікке шыққан аяулы жан немерелерін бағып, жас буынды ұлттық құндылықтарға тәрбиелеуге күш салып келеді екен.
— 2005 жылы осы Семей қаласына көшіп келген едім. Сол кезде осы «Айша бибі» қазақ мәдени орталығының бар екенін естідім. Бұл орталықтың мүшелерімен бір шарада кездесіп қалғанымда, ол кісілер мені өздеріне шақырды. Ұсынысты қабыл алдым. Өзім, негізінен, халық әндерін айтуды ұнатамын. Бірнеше байқауларда жеңімпаз да болдым. Бүгінгі уақытта үш немеремнің тәрбиесімен айналысып келемін. Ал мына өнер сайысы ата-бабаларымыздан мирас болып қалған дәстүрімізді насихаттап, оларды жаңғырта түседі деген үміттемін. Халқымыздың әдеп-ғұрпының мәні мен маңызы өте терең. Сондықтан да біз ұлттық мәдениетіміздің жақсы жақтарын өскелең ұрпаққа дұрыс жеткізе білуіміз қажет деп есептеймін,- деді Роза Исақызы.
Жақсылық МҰРАТҚАЛИҰЛЫ, «Семей таңы»
