Бесқарағай ауданының тұрғын-дары өз өңірлерінде ұйымдастырылған айтулы шараның куәсі болды. Атап айтсақ, осы ауданға қарасты Қоянбай ауылында әз Наурыз мерекесі тойланды. Жыл басындағы думанды шаралар аясында Ресей Федерациясының көршілес Алтай өңіріне қарасты Михайлов ауданымен ынтымақтастық жөнінде мемо-рандумға қол қойылды.
Аталмыш мерекелік шара ел Тәуелсіздігінің 25 жылдығына орай ұйымдастырылыпты. Бұл күні Қоянбай ауылына таяу маңда 13 киіз үй тігіліп, алтыбақан мен спорттық сайыстарға арналған алаңдар құрылды. Түрлі ұлт өкілдері тұратын Бесқарағай ауданының халқы тайқазанды наурыз көжеге толтырып, қонақтарға дәм татқызды. Алтай өңірінен мәртебелі меймандар көп келіпті.
Аудан халқын шаттыққа бөлеген ауқымды мерекеде атымтай жомарт азаматтар «Туған жерге тағзым» акциясы аясында қайырымдылық шара өткізді. Қоянбай орта мектебінде өлке тарихына арналған мұражай ашылды. Мұнда 100-ден астам жәдігер мен құжаттар қойылды. Мұғалімдердің айтуынша, өскелең ұрпаққа патриоттық тәрбие беруде мәдени мекеме жұмысының маңызы зор.
Айта кету керек, Бесқарағай ауданы мен Алтай өңірінің Михайлов ауданы арасындағы ынтымақтастық пен әріптестік қарым-қатынастар жылдан-жылға нығайып келеді. Мереке аясында экономикалық және мәдени байланысты кеңейту мақсатында екі аудан басшылары өзара меморандумға қол қойды. Жаңа құжат әріптестікті одан әрі нығайтып, түрлі салада жаңа жетістіктерге бірлесіп қол жеткізуге ықпал етпек.
— Біз Бесқарағай ауданымен тығыз қырым-қатынас орнаттық. Әріптестік тек мәдениет саласында ғана емес, әрине. Жаңа меморандумға сәйкес, ауылшаруашылық дақылдарын өндірудегі технологиялық әдістер бойынша тәжірибе алмасу көзделген. Жазда біздің өңірде осыған қатысты ауқымды халықаралық семинар өтеді. Дәнді және майлы дақылдарды өсіруде диқандарымыздың бір-бірінен үйренері көп. Сонымен қатар туризм саласы бойынша да әріптестік орнатқымыз келеді, — дейді Алтай өлкесінің Михайлов ауданының басшысы Геннадий Юров.
Ауылдықтардың мерейін асырған осынау шара аясында тұрғындар қарағай көшеттерін отырғызды. Бұдан бөлек ауылға кіреберісте демеушілердің қаржыландыруымен арнайы стелла ашылды. Аудан әкімі Нұржан Тоқсеитов айтып өткендей, әлеуметтік-экономикалық әлеуеті жылдан-жылға артып келе жатқан өңірде инвесторлар үшін қолайлы жағдай қалыптасқан.
— Өздерінің бастамасымен игі іс ұйымдастырып жатқан шағын ғана Қоянбай ауылындағы осынау шара басқа ауылдарда да жалғасын табады деп ойлаймын. Бұл істің өңірдің өркендеуі үшін берері мол деп білемін, — дейді аталмыш думанды шара жайында пікір білдірген аудан басшысы Нұржан Тлеужанұлы.
Мерекелік думанға Қоянбай ауылының барлық дерлік тұрғындары қатысты. Олар киіз үйлерді ұлттық нақышта безендіріп, мол дастарқан жайып, ұлттық салт-дәстүр мен әдет-ғұрыптардан түрлі көрістер көрсетті. Мереке ат спорты жарыстарына ұласты. Ауылдық округ командалары көкпар, теңге алу, аударыспақтан өзара мықтыларды анықтады. Сондай-ақ тай жарыс, жорға жарыс, топ бәйге мен аламан бәйге ұйымдастырылып, жеңімпаздар бағалы сыйлықтарға ие болды.
Самат СЕКЕНОВ,
Қуаныш ЖОЛЫМБЕТ,
Семей қаласы.
