20 наурыз күні өткен Қазақстан Республикасы Парламенті Мәжілісі және барлық деңгейдегі мәслихат депутаттарының сайлауында белсенділік танытқан «Нұр Отан» партиясының мүшелері Елбасы, Партия Төрағасы Нұрсұлтан Назарбаевтың Алғыс хатымен марапатталды.
Саяси науқан кезінде тынымсыз еңбек еткен жандарды қала әкімі Ермак Сәлімов құттықтады.
— Бәріңізге белгілі, биылғы жыл өте ауқымды, маңызды шараларға толы болды. Соның ішінде наурыз айында өткен Қазақстан Республикасы Парламенті Мәжілісі және барлық деңгейдегі мәслихат депутаттарының сайлауы әрқайсысымыздың ел болашағы жолындағы жауапкершілігіміз бен ауызбірлігімізді көрсетті,- деген Ермак Бидахметұлы сайлау кезінде белсенділік көрсеткен азаматтарға Мемлекет басшысы, Партия Төрағасының Алғыс хатын табыстады. Сондай-ақ қала әкімі дауыс берушілердің көпшілігі саяси науқанның маңыздылығын, өз дауысының шешуші нәтиже беретінін жақсы түсінгенін жеткізіп, қалалық штаб мүшелері уақытпен санаспай, талапқа сай жұмыс істегенін атап өтті. — Сайлау барынша ашық өтіп, еліміздегі тұрақтылық пен демократиялық қағидалардың сақталғанына тағы бір мәрте көз жеткіздік,– деген қала әкімі сайлау науқанына қатысқан органдар мен салалардың жұмысына жоғары баға берді. Ермак Бидахметұлы атап өткендей, барлық сайлау учаскелеріндегі жұмыс талапқа сай болды. Қала әкімі сайлау науқанында белсенділік танытқан жандарға алғыс айта отырып, Қазақстан Республикасының Президенті Нұрсұлтан Әбішұлы Назарбаевтың және «Нұр Отан» партиясы Төрағасының бірінші орынбасары Асқар Мырзахметовтің алғыс хатын табыстады. Саяси науқан кезінде белсенділік танытып, Елбасының Алғыс хатына ие болғандар қатарында Семей қалалық мәслихатының хатшысы Бейсенбек Ақжалов бастаған топ, атап айтқанда Валентина Байрамова, Александр Данилов, Ерлан Жақып, Дархан Жұмаділов, Ерғазы Жұмаділов, Қуаныш Қасенов, Руслан Кепке, Қайрат Мирашев, Айнұр Арғынбекова, Мұхтарғазы Төлеутай бар. Сонымен қатар «Нұр Отан» партиясы Төрағасының бірінші орынбасары Асқар Мырзахметовтің алғыс хатымен марапатталғандар ортасында «Семей таңы – Вести Семей» газеттері директорының орынбасары Сәуле Биназарова да бар. Редакция ұжымы марапатқа ие болған Сәуле Секенқызының алдағы уақыттағы жұмысына табыстар тілейді!
Асан МЫРЗАХАН, «Семей таңы»
