Алаш арыстары көсемдерінің бірі әрі бірегейі, ұлт қамы үшін жанын шүберекке түйген, сол жолда қолына шырақ ұстап өткен Ахмет Байтұрсыновтың «Газет — халықтың көзі, құлағы hәм тілі» деген асыл да аталы сөзі әлі де күн тәртібінен түскен жоқ. Газет десек, газет жөнінде бір сәт ойланар болсақ, жүрегіміз жылып, газетке деген сүйіспеншілігіміздің оянары хақ.
Міне, сондай өмірден өз орнын ойып, Алаш арыстарының ұстанымдарына адалдық танытып, қалың бұқараның, соның ішінде Шығыс Қазақстан мен Семей өңірінің оқырмандарының жүрегіне жол тауып, үні мен тілі болып отырған бірден – бір әрі бірегей басылым — өзіміздің сүйікті де қымбат, абыройлы да асқар «Семей таңы» газеті.
«Семей таңы» — әрбір шаңырақтың шырағы, әрбір отбасының пырағы, әрбір отбасының көзі, ат үстінде жүрген әрбір басшының ойы мен ұстанымы.
«Семей таңында» жарық көрген әрбір мақалаға тұшынасың. Оқыған сайын, тереңіне бойлаған сайын шөлің қанады. Өткірлігіне тәнті боласың. Газетті басқарып отырған Риза қарындасымыздың өрлігі мен ерлігі, қайтпас қайсар мінезі «Семей таңынан» көрініп тұр.
«Морозов деген кім болған?», «Абайдың інісі, Алаштың ірісі», «Кадрдан қадір кетті ме?», «Желтоқсан сайын жетім боп, бір жылап алар жүрек бар», «Есегі жоғалғанның бәрі ақылды», «Қазақша сөйле, шенеунік, қазақша!» деген Риза қарындасымыздың жүрегін жарып шыққан мақалаларды бейжай отырып оқи алмайсың. Міне, газет осындай болуы керек деген ой түйесің.
Қарапайым газет оқырмандарына «Семей таңы» осылайша қымбат. 45 жылдан бері қарай газетпен бірге жасасып, бірге тыныстап келемін. 70-ші жылдары «Семей таңының» штаттан тыс тілшісі» деген куәлікті қолыма алуым өміріме көп өзгеріс әкелді. Журналистік жолды таңдаудағы темірқазығым да, жолашарым да осы «Семей таңы» болды.
Белгілі ғалым Тұрсын Жұртбаев, арқалы ақындар Төлеген Жанғалиев, Мұратбек Оспанов, сырбаз мінезді Төлеубек Аманғазин, мұражай директоры Малгаждар Жүнісжанов, ауылда тұрған Рысбек Көркембаев сияқты аптал азаматтар да «Семей таңының» штаттан тыс тілшілері сапынан берік орын алды. Біздер әлі де «Семей таңынан» қол үзген жоқпыз. Әлі де «Семей таңының» әрбір санын асыға тосып отырамыз.
Алда, яғни 2017 жылы, «Семей таңы» 100 жасқа толғалы отыр. Бұл — үлкен мереке. Бір ғасырлық тарихы бар «Семей таңы» қазақ баспасөзінің жарық жұлдызы және көшбасшысы. Бұл жасқа небір тар жол, тайғақ кешуді басынан өткерген «Семей таңы» да жетіп отыр.
Құрметті оқырман қауым! Ойды ой қозғайды. Ендеше, рухани азығымыз, өмірдегі темірқазығымыз «Семей таңымен» 2017 жылы да бірге болайық. Бірге қауышайық. Газетті қолдайық, газетке ұйымшылдықпен бір кісідей жазылайық! Әсіресе Абай елінің азаматтарына үлкен сын. Мекеме басшылары, ауыл әкімдері, мектеп директорлары, ұстаздар қауымы, ардагерлер ұйымы, ақ халатты абзал жандар, кәсіпкерлер, Абай бабамыз айтқандай, «Семей таңына» жазылуда «қолымызды кеш сермеп, өкініп қалмайық». Уақыт жылдам. Уақыттан ұтылмайық. Уақытты ұтайық.
Абай елінің әрбір шаңырағында «Семей таңы» тұратын болса, жүрегіміз жылынып, еңсеміздің тік жүретіндігін ешқашан ұмытпайық, ағайын! «Семей таңымен» бірге болайық, «Семей таңымен» бірге тыныстайық. «Семей таңының» 100 жылдық мерейлі мерекесі қайырлы, қош болсын!
Совет МАХМЕТОВ,
КСРО және Қазақстан Журналистер одағының мүшесі,
Абай ауданы.
