«Нұрлы жол» мемлекеттік бағдарламасы аясында Семей қаласында 36 пәтерлі жаңа тұрғын үй пайдалануға берілді. 26 желтоқсан күні қала әкімі Ермак Сәлімов жалдамалы тұрғын үйдің лентасын қиып, тұрғындарға пәтер кілттерін табыс етті.
Шығыс Қазақстан облысы бойынша тұрғын үй құрылысы бағдарламасымен салынған жаңа тоғыз қабатты үй сол жағалауда, семейліктер «Океан» ықшам ауданы атап кеткен Өтепбаев көшесінде орналасқан. Тұрғын үй құрылысы «Ертіс» әлеуметтік кәсіпкерлік корпорациясының бастамасымен жыл басында басталып, желтоқсан айында құрылыс толық аяқталып отыр. Айта кетейік, құрылыс жұмыстары «Азия» ЖШС фирмасымен бірлескен жұмыс нәтижесінде іске асырылған («Азия» ЖШС — 51%, «Ертіс» ӘКК ҰК — 49%). Құрылыс жұмыстарына бөлінген қаражат көлемі 365, 251 млн. теңге. Мердігер компания «Азия» ЖШС-мен жасалған келісімшарт нәтижесінде фирма тарапынан 127, 791 млн. теңге бөлініп, толығымен игерілді. Тұрғын үйде бір және үш бөлмелі пәтерлердің саны 9 болса, екі бөлмелі пәтерлер саны 18-ді құрайды, ал шаршы метрдің құны 145 мыңға жетеқабыл.
Бұл жолы да баспаналы болып жатқан ағайынның қуанышына қала әкімі Ермак Сәлімов ортақтасты. Қала әкімі пәтер кілтін табыс етіп, қоныс иелеріне ізгі тілегін де білдірді.
— Бүгін барлығымыз қуанышта қауышып отырмыз. Баршаңызды осы қуаныштарыңызбен құттықтаймын. Жаңа пәтерге ие болып, жаңа көрші тауып жатырсыздар. Үйлеріңіздің іші жанға толсын. Тәуелсіздіктің 25 жылдығы қарсаңында бір тұрғын үй, балабақша пайдалануға бердік. Енді, міне, жаңа тұрғын үй құрылысы да аяқталды. Осы үйдің қасынан тағы да бір жаңа үй салынып жатыр. Қаламызда, облыста құрылыс жұмыстарына жақсы көңіл бөлініп келеді. Аман-есен қыстан шықсақ, жазда тағы да көп қабатты тұрғын үй салу жұмыстарына кірісеміз,- деді құттықтау тілегінде Ермак Бидахметұлы.
Салтанатты түрде пәтер иелеріне кілттер табысталып, лента қию рәсімі өткеннен кейін Ермак Бидахметұлы қоныстанушылармен бірге тұрғын үйді аралап көрді.
Айта кетейік, тұрғын үйді пайдалануға беру туралы актіге мемлекеттік комиссия 3 желтоқсан күні қол қойған. Бүгінгі таңда пәтерлердің барлығы пайдалануға берілген. Осы тұрғын үй жанынан салынып жатқан 54 пәтерлі, 9 қабатты жаңа үйдің құрылысы да аяқталуға жақын. Сәтін салса, келер жылдың қаңтар айында аталмыш тұрғын үйде де қоныс тойы тойланады.
Жадыра ТӨЛЕГЕНҚЫЗЫ,
Семей қаласы.
