28 қыркүйек күні Семей қалалық әкімдігінде Ленин көшесі мен Полковничий аралының атауларын өзгерту туралы қоғамдық тыңдау өтті. Қоғамдық тыңдауға қоғамдық кеңес мүшелері, қоғам белсенділері, қоғамдық ұйымдар және қала тұрғындары қатысты.
Ленин көшесін «Мәңгілік ел» атауына өзгерту – көптен бері қозғалып жүрген тақырыптардың бірі. Орталық көшелердің бірі саналатын Ленин көшесінде қазіргі күні Достық үйі, «Қазақстан Халық банкі» АҚ, Семейдің облыстық тарихи-өлкетану музейі, Қазақ инновациялық — гуманитарлық заң университеті, Орталық саябақ сынды бірқатар маңызды мекемелер орналасқан.
Көше атауын өзгерту туралы сөз қозғалысымен жиналғандар пікірі екіге жаралды. Кейбіреулер өткен тарихқа тиісу мүлде қажетсіз деп, Ленин көшесінің атауын сол күйінде қалдыруды ұсынды. Дегенмен, көпшіліктің қолдауымен, қалалық мәслихат депутаттарының бірауыздан шыққан пікірімен Ленин кө-шесінің атауын «Мәңгілік ел» деп ауыстыру туралы шешім қабылданды. Бұл шешім алдағы уақытта облыстық мәслихат депутаттарының қарауына жіберіліп, облыс әкімінің назарына ұсынылатын болады.
Қалалық ардагерлер кеңесінің төрағасы Амантай Доға-лақов, қоғамдық тыңдауда алғашқылардың бірі болып пікірін білдірді:
— Ленин көшесінің атауын «Мәңгілік ел» атауына ауыстыру туралы сөз осыдан бір жарым жыл бұрын, Алаш қозғалысының 100 жылдығына даярлық барысында айтылған болатын. Алаш көсемі Әлихан Бөкейхановқа ескерткіш қою мәселесі де осы кезде қозғалған. Бұл орайда Ленин көшесі бойында орналасқан мәдени мекемелер мен қоғамдық ұйымдардың пікірлері де ескерілгенін білген жөн. Барлығы жаңа атауды қолдайтындарын білдірді. Кейбіреулер Ленин көшесіне Әлихан Бөкейханов есімін беру туралы сөз қозғап жүр. Комсомол кентінде Әлихан Бөкейханов көшесі бар болғандықтан, екі көше атауы бірдей бола алмайды. Мұны да ескерген дұрыс. Қаланың бюджеті 3 жылға жоспарланып отыр, сондықтан келер жылы Әлихан Бөкейханов көшесіне жөндеу жұмыстары жүргізілетін болады, — деді Амантай Доғалақов.
— Өзге қалалар Ленин ес-керткішін алып жатқанда, біз, семейліктер, шыдамдылық таныттық. Бұл мәселені ертеректе бір жолға қою керек еді. «Әмина» мұсылман әйелдер қауымдастығы және «Ахау Семей» салт-дәстүр орталығының мүшелері атынан «Мәңгілік ел» атауын қолдайтынымды жеткіземін, — деген пікірін білдірді қоғам белсендісі Гүлжихан Жұматаева.
Полковничий аралының атауын «Бейбітшілік аралына» өзгерту жайы да қоғамдық тыңдауға келгендер талқысына түсті. 1934 — 1990 жылдары Киров, 1990 жылдан бері Полковничий немесе Түйемойнақ аралы деп аталып келген аумақ атауын «Бейбітшілік аралы» деп өзгерту туралы шаһардың ақсақалдары атынан ұсыныстың түскеніне де біраз уақыт болыпты.
— Қазір аралдың атауы орыс тілді басылымдарда Полковничий, ал қазақ тілді басылымдарда Түйемойнақ деп жазылып жүр. Біз аралдың орыс тілінде де, қазақ тілінде де «Бейбітшілік аралы» деген бір атаумен аталғанын қалаймыз. Осы ұсынысты жергілікті билік өкілдеріне бұрын да жолдап едік. «Бейбітшілік аралы» деп атайтын себебіміз, бұл жерде «Өлімнен де күшті» монументі мен «Бейбітшілік стелласы» орналасқан. Әр жылдың 29 тамызы күні аралда бейбітшілік шеруі өтеді. Сондықтан «Бейбітшілік» атауы бірден-бір дұрыс шешім, — деді еңбек ардагері Мұстафа Ілиясов.
Қоғамдық тыңдауға қатысып отырған көпшілік мұның көңілге қонымды ұсыныс екенін айтып, қолдау танытып жатты. Халық қалаулылары да ұсынысты құп алды.
Қалалық мәдениет және тілдерді дамыту бөлімінің басшысы Назерке Аққожина, отырыс соңында жиылғандарды тағы бір маңызды мәселемен құлағдар етті. Оның айтуынша, қала шетіндегі Қарағайлы ықшам ауданындағы көшелерге халқымыздың үш биі – Төле би, Қазыбек би және Әйтеке бидің аттарын беру туралы ұсыныс облыстық ономастика орталығына жіберіліпті.
Айта кетейік, Ленин кө-шесінде орналасқан ғима-раттардағы көше атауы жа-зылған бір тақтайшаны жаңарту үшін 2958 теңге жұмсалмақ. Қазіргі уақытта көше бойында 128 ғимарат орналасқанын ескерсек, кететін шығын көлемі 378 624 теңгені құрап отыр. Ал Түйемойнақ аралында орналасқан 108 тұрғын үй үшін бюджеттен 319 464 теңге қарастырылған.
Жадыра ТӨЛЕГЕНҚЫЗЫ, «Семей таңы»
