Semeytany.kz — Абай облысының білім басқармасы ҚР Президенті Қасым-Жомарт Тоқаевтың 2025 жылғы Жолдауына байланысты кеңес өткізді. Жиынға облыс әкімінің орынбасары Мейірлан Раханов төрағалық етті. Басқосуға аудандық және қалалық білім бөлімдерінің басшылары, мектеп пен колледж директорлары, педагогтер қатысты.
Кеңесте Жолдауда белгіленген негізгі бағыттар талқыланды: жасанды интеллектті оқу үдерісіне енгізу, мұғалімдердің цифрлық құзыретін арттыру, шағын жинақты мектептердің әлеуетін күшейту, инклюзивті білім беруді дамыту және ауыл мектептеріне тең мүмкіндік ұсыну. Мейірлан Раханов құжаттың ел дамуының жаңа кезеңін айқындайтынын айтып, AI, Big Data, блокчейн және автоматтандырудың бәсекеге қабілеттіліктегі рөлін атап өтті. Оның айтуынша, «AI-Sana» арқылы студенттердің технологиялық жобаларға қатысуы, «Digital Mektebi» бастамасымен ауыл мектептерінің мүмкіндігін кеңейту және мұғалімдердің цифрлық дағдысын күшейту өңір үшін басым бағыт.
Білім басқармасының басшысы Бауыржан Ердембеков меценаттық пен мемлекеттік-жекеменшік әріптестікті жандандырудың нәтижелерін ұсынды. Мысалы, «Алматыкітап» баспасы №35 мектепке 60 мың кітап қоры бар заманауи кітапхана сыйлаған. Ауыл мектептеріне 40 жылжымалы кітапхана жеткізу жоспарланып отыр. «Қазақстан халқына» қорының қолдауымен былтыр 7 мектеп жарақтандырылса, биыл тағы 4 білім ошағы қосылады. 2026 жылға дейін 6500-ден астам мұғалім цифрлық оқыту курстарынан өтпек. Ерекше білім беруді қажет ететін балаларға арналған кабинеттер мен қолдау орталықтарын ашу да күн тәртібінде.
Пікірталасқа педагогтер де атсалысты. Шәкәрім атындағы көпбейінді №5 гимназияның ардагер ұстазы Алма Аубакирова, Семей қаласындағы №17 мектеп директоры Райгүл Жұмақанова және IT және жаңа технологиялар жоғары колледжінің оқытушысы Айдын Қасымжанов жасанды интеллектті білім жүйесіне енгізу, инклюзивті білімді дамыту және «AI-Sana» бағдарламасының маңызы жөнінде ой бөлісті.
Кеңес соңында ұлы ақын Абай Құнанбайұлының туғанына 180 жыл толуына арналған мерейтойлық шараларға қосқан үлесі үшін бірқатар білім беру саласының қызметкерлеріне Абай облысы әкімінің Алғыс хаттары табысталды.
