Өткен сенбі, 20 қазан күні Семейге облыс әкімінің орынбасары Серік Ақтанов келіп, Елбасы Жолдауын жүзеге асыру мақсатында ШҚО-да атқарылып жатқан жұмыстармен таныстырды. Қалалық әкімдікте өткен жиынға қала әкімінің орынбасары Николай Ушаков, қалалық мәслихат хатшысы Бейсенбек Ақжалов және бөлім қызметкерлері қатысты.
Елбасы Жолдауының басты 6 бағытына тоқталған ШҚО әкімінің орынбасары Серік Қасымбекұлы ең төменгі жалақы мөлшерінің 28 мыңнан 42 мыңға және бюджеттік мекеме қызметкерлерінің еңбекақысы 30 пайызға көтерілетінін, «Бизнестің жол картасы — 2020» бағдарламасының 2025 жылға дейін жалғасатынын, сондай-ақ көлік-логистика саласын дамытуға баса көңіл бөлініп отырғанын айтып өтті.
— Семей әуежайы күрделі жөндеуден өтті. Жуырда пайдалануға беріледі. Ал келесі жылы Өскемен әуежайын жөндеу жұмыстары басталады. Сонымен қатар Үржар әуежайының ұшып-қону жолағы да қалыпқа келтірілмек. Бұл жұмыстар 2019-2020 жылдар аралығында жалғасады,- деді ШҚО әкімінің орынбасары.
Семей мен Өскемен қалаларындағы қоғамдық көлікті оңтайландыру — өзекті мәселелердің бірі. Серік Қасымбекұлының айтуынша, бұл бағытта Еуропалық қайта құру және даму банкімен, Қазақстан даму банкімен келісімшартқа қол қойылған. Екі жыл ішінде Өскемен мен Семейдегі автобус парктерін жаңартып, 9,5 млрд. теңге қаржыға 255 жаңа көлік сатып алу жоспарлануда. Жаңа электрондық билет жүйесі де келесі жылы іске қосылмақ.
— Елбасы тапсырмаларының бірі — елдегі ішкі және сыртқы туризмді жандандыру. Соңғы үш жылда Алакөл маңын абаттандырып, жолдарын жөндеуге, әуе және темір жол хабарламарын ұйымдастыруға облыстық бюджеттен 5,2 млрд. теңге бөлінді. Ендігі мақсатымыз – көлге бір жылда келетін туристер санын миллионға жеткізу,- деді С.Ақтанов.
Елбасы Жолдауларында баламалы энергия көздерін дамыту туралы жиі айтылып келеді. Осы бағытта қолға алынған Зырян ауданындағы Тұрғысын су электр станциясы құрылысы жыл соңына дейін аяқталмақ. Ал 2019-2024 жылдар аралығында ШҚО-да күн және қуаттылығы 131 МВт-ты құрайтын 3 жел электр станциясын салу жоспарлануда.
Жолдауда айтылған екінші басты бағыт – тұрмыс сапасын арттыру. Елбасы 5 жыл ішінде білім, ғылым, денсаулық сақтау салаларына барлық көздерден жұмсалатын қаражатты ішкі жалпы өнімнің 10 пайызына дейін жеткізу туралы тапсырма берді. Соңғы үш жылда ШҚО-да білім саласында жалпы сомасы 4,9 млрд. теңгені құрайтын көптеген маңызды жобалар жүзеге асты.
— Оның ішінде үш тілде білім беруді жүзеге асыруға жергілікті бюджеттен 2,2 млрд. теңге қарастырылды. Облыстың барлық мектептері үшін жаңа оқулықтар алынып, қазақ, ағылшын тілдерін оқытуда Кембридж жүйесі енгізілді, мұғалімдер біліктілікті арттыру курстарынан өтті. Биылғы жылы «Рухани жаңғыру» бағдарламасы аясындағы «Менің мектебім» жобасы шеңберінде облыс мектептерінде бюджеттен тыс қаражат көздерінен 2,80 млрд. теңгеге Назарбаев Зияткерлік мектебінің стандарттарына сай жабдықталған 476 кабинет ашылды. Оның ішінде робототехника кабинеттері де бар. Облыста екінші жыл қатарынан аймақ экономикасындағы сұранысқа ие мамандықтарға грант бөлуге арналған «Білікті маман» жобасы жүзеге асуда. Қазірдің өзінде 646 студент аталмыш жобамен білім алуда. Соңғы екі жылда облыста мектеп бітіруші түлектердің шетелдерге кетуі 3 есеге азайғаны байқалады,- деді С.Қасымбекұлы.
Медицина – аймағымызда қарқынды дамып келе жатқан салалардың бірі. Биылғы жылы Өскемен қаласында роботталған хирургия және трансплантология орталығы, Зырян мен Аягөз аудандарында ІІ деңгейлі инсульт орталықтары ашылды. Ал келесі жылы Өскемен қаласында 200 орынға арналған балалар ауруханасын пайдалануға беру көзделуде.
— Жыл соңына дейін Семей қаласының Жедел медициналық жәрдем ауруханасының бірегей гибридті ота залы мен травмотология орталығын жабдықтауды аяқтайыз. Ал 2020 жылы Семей қаласында радиология, 2021 жылға қарай гемотология орталықтарының құрылыс аяқталады,- деді ШҚО әкімінің орынбасары Серік Ақтанов.
Жиын соңында қаладағы мекеме басшылары мен бөлім қызметкерлері Елбасы Жолдауында айтылған тапсырмаларды жүзеге асыруға атсалысатындарын жеткізді.
Жадыра Төлегенқызы, «Семей таңы»
