Елбасының «Болашаққа бағдар: рухани жаңғыру» бағдарламалық мақаласында аталған алты үлкен жобаның бірі – «Жаңа гуманитарлық білім: қазақ тіліндегі 100 жаңа оқулық» жобасы. Семей қаласында жаңа оқулықтардың таныстырылымы өткен жұма, 12 сәуір күні Шәкәрім университетінде өтті.
«Жаңа гуманитарлық білім: қазақ тіліндегі 100 жаңа оқулық» жобасы аясында 2018-2019 оқу жылында Шәкәрім университетінің кітапханасына барлығы 1700 данамен 19 оқулық келіп түскен. Атап айтсақ: Дерек Джонстонның «Философияның қысқаша тарихы. Сократтан Дерридаға дейін»; Энтони Кеннидің «Батыс философиясының жаңа тарихы. Антика философиясы» І томы және «Батыс философиясының жаңа тарихы. Орта ғасыр философиясы» ІІ томы; Реми Хесстің «Философияның таңдаулы 25 кітабы»; Дэвид Бринкерхоф, Роуз Уейтс, Сюзан Ортеганың «Әлеуметтану негіздері»; Джордж Ритцер, Джеффри Степницкидің «Әлеуметтану теориясы»; Эллиот Аронсонның «Көпке ұмтылған жалғыз. Әлеуметтік психологияға кіріспе»; Дуэйн Шульц, Сидней Эллен Шульцтің «Қазіргі психология тарихы»; Дэвид Г. Майерс, Жан М.Туенждің «Әлеуметтік психология»; Н.Грегори Мэнкью, Марк П.Тейлордың «Экономикс»; Дональд Ф.Куратконың «Кәсіпкерлік: теория, процесс, практика»; Рикки У.Гриффиннің «Менеджмент»; Карен Армстронгтің «Иудаизм, христиандық пен исламдағы 4000 жылдық ізденіс: Құдайтану баяны»; Виктория Фромкин, Роберт Родман, Нина Хайамстың «Тіл біліміне кіріспе»; Светлана Тер-Минасованың «Тіл және мәдениетаралық коммуникация»; Алан Барнардтың «Антропология тарихы мен теориясы»; Клаус Швабтың «Төртінші индустриялық революция»; Ли Энн Пек, Гай С.Рил «Медиа этика. Жас мамандардың тәжірибесінен», Стивен Ковидің «Жасампаз жандардың 7 дағдысы».
— «Рухани жаңғыру» бағдарламасының екі жылдығына және ғылым күніне орай «Жаңа гуманитарлық білім: қазақ тіліндегі 100 жаңа оқулық» жобасы аясында жарық көрген оқулықтардың таныстырылымын ұйымдастырып жатырмыз. Қазіргі уақытта профессорлар-оқытушылар құрамы және студенттер өз салалары бойынша оқулықтарды оқу жүйесінде қолдануда. Оқулықтар сыртқы дизайны мен ішкі мазмұн сапасының жоғары болуымен де ерекшеленеді. Швейцария, Ресей, Ұлыбритания, АҚШ сынды мемлекеттердің алдыңғы қатарлы оқулықтарының қазақ тіліне аударылып, бізге және студенттерге қолжетімді болғанына қуаныштымыз. Әсіресе Стивен Ковидің «Жасампаз жандардың 7 дағдысы» кітабының тұлғаны қалыптастыруда маңызы зор. Жаңа оқулықтар арқылы біз қазақ аудиторияларындағы талқының мазмұны мен деңгейін көтереміз. Сол арқылы жалпы гуманитарлық білімнің мазмұны мен сапасы мүлде жаңа деңгейге шығуы тиіс. Өйткені әлемдік гуманитарлық ғылым қазақ тіліне мұндай көлемде ешқашан аударылған емес,- дейді «Мәңгілік Ел» кафедрасының меңгерушісі Бақытгүл Оралбекова.
Жаңа оқулықтарды студенттерге Шәкәрім университетіндегі ғылыми кітапхананың директоры Елена Петровна таныстырды. Университет кітапханасына алғашқы оқулықтар 2018 жылдың маусым айында Астана қаласының 20 жылдығына орай ұйымдастырылған ғылыми конференция барысында келіп түскен.
Айта кетейік, «Жаңа гуманитарлық білім: қазақ тіліндегі 100 жаңа оқулық» жобасын жүзеге асыру барысында 2017 жылы арнайы жұмыс тобы құрылып, АҚШ, Англия, Швейцария, Франция және Ресейдің жетекші баспаханаларымен келісімшарт жасалды. Ұлттық аударма бюросы құрылып, 90-нан астам маман жұмылдырылды. 2018 жылғы сәуірде Астана қаласында алғашқы аударылған оқулықтардың ресми таныстырылымы өтті. Мемлекеттік тапсырыс бойынша шыққан әр кітаптың 10 мың данасы 110 оқу орнына тегін таратылған.
Жаңа оқу жылында тағы 30 оқулық пайдалануға берілмек.
Жадыра ТӨЛЕГЕНҚЫЗЫ, «Семей таңы»{jcomments off}
