Семейге ҚР Президенті аппараты жанынан құрылған арнайы жұмыс тобы келді. Жұмыс тобының келудегі мақсаты – ШҚО-дағы балалардың құқықтары мен заңды мүдделерін қорғауды қамтамасыз ету жүйесін жетілдіру, ұсыныстар жинау мен зерделеу жұмыстарын жүргізу.
Қалалық әкімдікте жұмыс тобы білім бөлімінің, денсаулық сақтау, жұмыспен қамту және әлеуметтік бағдарламалар бөлімінің, мәдениет және тілдерді дамыту, спорт бөлімінің, полиция бөлімінің, кәмелетке толмағандардың істері және олардың құқықтарын қорғау жөніндегі комиссияның басшыларымен кездесу өткізді.
— «Nur Otan» партиясы «Бақытты отбасы» жобасын жүзеге асыруда. Семейге төрт арнайы топ келдік. Әдетте, сапар кезінде 70 – ке жуық нысан, 13-ке жуық аудан мен ауылда болып, барлық жүйені, оның тиімділігін, сапасын, ең бастысы, балалардың құқықтарын қорғау және отбасындағы жұмыс бойынша нәтижелілікті зерттейміз. Баланың жағдайы отбасындағы ахуалға байланысты, сондықтан жергілікті атқарушы органдардың әртүрлі санаттағы отбасыларға көмек беруге байланысты міндеттерін қалай жүзеге асырып жатқандарын басты назарда ұстаймыз,- деді «Nur Otan» партиясы жанындағы балалардың құқықтарын қорғау кеңесі төрағасының орынбасары Динара Закиева. — «Бақытты отбасы» жол картасында отбасын қолдау жүйесін құрудың кең ауқымы қарастырылған.
Кәмелетке толмағандар арасындағы суицидтік мінез-құлық мәселесі өзекті және назар аударуды қажет етеді. Жағдайды жақсарту және ведомствоаралық өзара іс-қимылды күшейту үшін барлық қалалар мен аудандарда қала және аудан әкімдері орынбасарларының төрағалығымен жедел жұмыс топтары құрылды. Олар алдын алу жұмыстарын жүргізіп, орын алған суицид жағдайларының себептері мен факторларын анықтайды. Суицидтің, кәмелетке толмағандар арасындағы құқық бұзушылықтардың және балаларға қатысты зорлық-зомбылықтың алдын алуға байланысты кешенді іс-шаралар жоспары жасалды.
Білім беру мекемелерінің базасында 1 қыркүйектен бастап «Бақытты отбасы» партиялық жобасы аясында «Саналы ата-ана» курсы ашылады.
Семейде жұмыс тобы қалалық ауруханаға, №8 балалар үйіне, кәмелетке толмағандарды бейімдеу орталығына, балалар үйіне, саңырау (естімейтін) балаларға арналған мектеп-интернатқа әлеуметтік қызмет көрсететін мекемелерге барды.
Семей қаласының ақпараттық орталығы{jcomments off}
