1 қыркүйек – Білім күніне орай, Семей қаласының мектептерінде де алғашқы қоңырау мерекесі болып өтті. Биылғы жаңа оқу жылында өңір бойынша 5050 балақай бірінші сынып оқушысы атанып, алғаш рет мектеп табалдырығын аттады.
Қала әкімі Ермак Сәлімов шаһардағы № 37 гимназиядағы салтанатты шараға қатысып, ұстаздар мен оқушыларды жаңа оқу жылының басталуымен құттықтады.
— Қымбатты оқушылар, құрметті ұстаздар мен ата-аналар! Білім күні — баршаға ортақ халықтық мереке. Оның әрбір адам өміріндегі алар орны ерекше. Әсіресе мектеп есігін тұңғыш рет ашып отырған бес мыңнан аса кішкентай семейліктердің жүрегінде бүгінгі күн мәңгілік сақталады. Олай болса, тарыдай болып кіріп жатқан оқушылардың қадамы құтты, берекелі болсын! Биыл бұл мектептен тоғыз оқушы «Алтын белгіге», төрт оқушы үздік аттестатқа ие болды. Жалпы, оқу ордасы білім бәсекесінде үнемі алдыңғы қатардан көрініп келеді. Мұның барлығы ата-ана мен ұстаздардың оқушыға деген ыстық ықыласы, мемлекеттің қамқорлығының жарқын көрінісі. Жаңа оқу жылы жаңа бастама мен ізденістерге толы болсын. Ұстаз шыңдалып, шәкірт өссін. Ата-ана үміті ақталсын. Құрметті оқушылар, оқуда табысты болыңдар, мереке құтты болсын! — деді өз сөзінде Ермак Бидахметұлы.
Жалпы, аталмыш гимназияда биылғы оқу жылында 125 бүлдіршін мектеп табалдырығын аттапты. Олар 25 баладан тұратын бес сыныпқа бөлінген.
Салтанатты шара аяқталған соң қала әкімі Ермак Бидахметұлы білім ордасының музейін тамашалап, өткен күндер естеліктерімен танысты.
Өз тілшіміз{jcomments off}
