Өткен сейсенбі күні қалалық ақпарат орталығында өткен брифинг барысында қала құрылысы және архитектура бөлімінің мамандары БАҚ өкілдері алдында шаһар шырайын арттырудағы жүргізіліп жатқан жұмыстар барысы жайында тұшымды мағлұматтармен бөлісті.
Қазіргі күні қала көріктілігін арттыруда сыртқы жарнаманың алар үлесі зор. Дегенмен бұл ретте жүргізілуі тиіс бірқатар шаралар бар. Атап айтсақ, сыртқы жарнаманы заңсыз орнататындармен күрес жүргізіп, қала сәнін бұзатын мұндай «туындылардың» көше бойлары мен ғимараттар қасбеттерінде менмұндалауына жол бермеу қажет.
Қалалық архитектура бөлімінің бас маманы Ермек Ақанов айтып өткендей, бүгінде қала бойынша сыртқы жарнамаларды ілуде жүйе болмай тұр.
Қала орталығындағы кейбір сауда үйлерінде, атап айтсақ «Достық», «Арғымақ», «ЦУМ», «Vikar» сынды ірі орталықтарда сыртқы көрнекі жарнамалар көрсету үшін арнайы орындар белгіленген. Әйтсе де көздің жауын алар мұндай жарнамаларды өзге орындардан көптеп ұшырастыруға болады. Маңыздысы сол — олардың көлемі, түр-түсі талапқа сай келе бермейді.
Бұл ретте ағымдағы жылдың мамыр айынан бастап қалалық архитектура бөлімі сыртқы көрнекі жарнама орналастыру үшін арнайы рұқсат беру құқығына ие емес.
— Енді рұқсатты біз бере алмаймыз. Заңды тұлға немесе жеке азаматтар өзінің жарнама ілу туралы өтінішін арнайы портал арқылы жергілікті атқарушы органға жолдай алады. Өтінішімен қатар жарнаманың сызба нұсқасын да береді, — деді өз сөздерінде аталмыш бөлім мамандары.
Сонымен қатар 2017 жылы сыртқы көрнекі жарнама ілуден қала бюджетіне 84,7 млн. теңге қаржы түссе, 2018 жылы 86 млн, ал, ағымдағы жылдың 10 айы ішінде 75,8 млн. теңге қаражат құйылған.
Брифинг барысында сол сияқты қала сәнін кетіріп тұрған өзге де құрылыстар, атап айтсақ шаһардың кейбір аудандарындағы ескірген сауда павильондары мен дүңгіршектері жайында айтылды.
— Өткен жылдан бері қала бойынша орналасқан 280 дүңгіршек тексеріліп, оның 67-сі күрделі жөндеуден өткізіліп, талапқа сай етілді. Ал қалған 21 дүңгіршек иелері тарапынан ауыстырылды, — деді бұл ретте мамандар.
Дегенмен шаһардың эстетикалық келбетіне қатысты әлі де болса күрмеулі мәселелер бар. Мысалы, жарнамалық сипаттағы қағаздарды желіммен жабыстыру тоқтамай тұр.
— Бұл ретте қала әкімі тарапынан ТҮКШ бөліміне жарнамаларды жабыстыруға жол бермеуге байланысты арнайы тапсырма беріліп, жедел шаралар ұйымдастырылған болатын. Бұл тарапта бірқатар жұмыстар жүргізіліп жатыр, — дейді осы мәселеге қатысты түсінік берген мамандар.
Сол тәрізді қала аялдамаларындағы жаңадан орнатылған павильондарға жарнама қағаздарын жапсыратын адамдармен түсіндіру жұмыстары жүргізіліп жатқанын да айта кету ләзім.
Әлібек КЕМЕЛХАН, «Семей таңы»{jcomments off}
