17 қараша, жексенбі күні Абай театрында алматылық «Самұрық» заманауи би театры мен америкалық «Company E» би труппасы бірлесе өнер көрсетті. Шара АҚШ-тың Қазақстандағы Елшілігінің және Семей қалалық әкімдігінің қолдауымен жүзеге асты.
«Company E» — Вашингтон қаласының Колумбия округіндегі заманауи би труппасы. Израильдегі «H’aretz» басылымы аталған компанияны «АҚШ-тағы ең үздік заманауи труппалардың бірі», «Washington Post» газеті «батыл әрі талантты труппа» деп таныған. 2011 жылы құрылған “Company E” осы уақытқа дейін отыздан астам елде өнер көрсеткен.
Ал Алматыдағы «Самұрық» заманауи би театры 1998 жылы ҚР-ның еңбек сіңірген қайраткері Гүлнара Адамованың бастамасымен құрылған. Әзірге бұл театр — заманауи би өнері мен ұлттық нақышты ұштастырып жүрген Қазақстандағы жалғыз кәсіпқой ұжым. Соңғы кездері Гүлнара Адамова заманауи би өнеріне ұлттық дәстүрлер мен халық музыкасын пайдалану мүмкіндіктеріне көбірек көңіл бөледі екен. Труппа құрамында А.Додарходжаева, Е.Эзау, С.Жәнібекова, Е.Мұқаев, Б.Косманов, Г.Ященко, А.Багликов және басқа да талантты бишілер бар. Театр бірнеше мәрте халықаралық байқаулар мен фестивальдардың жеңімпазы, лауреаты атанды. Түркия (Стамбул), Қытай (Шанхай), Қырғызстан (Бішкек), Ресей (Санкт-Петербург), Австрия (Вена), Германия (Штутгарт) мемлекеттеріне барып, гастрольдік сапармен өнер көрсетіп қайтқан. 2011 жылы театр ұжымына өнерге қосқан үлесі үшін Қазақстан Республикасы Тұңғыш Президенті Қорының сыйлығы табыс етілді.
— Біз үшін сіздердің алдарыңызда өнер көрсету — үлкен абырой. «Самұрық» заманауи би театрымен тоғыз жылдан бері әріптестік қатынастамыз. Жиырма жылдан астам тәжірибесі бар театрмен жұмыс істеу — біз үшін де үлкен жетістік. АҚШ-тың Қазақстандағы Елшілігінің қолдауымен Қазақстан халқына өнерімізді көрсетуді жоспарлап отырмыз. Келесі бағытымыз — Павлодар қаласы,- деді кеш барысында «Company E» директоры Пол Гордон Эмерсон.
Кеш барысында толық метражды спектакльдер, балет, сондай-ақ өмір мен өлім, махаббат пен өшпенділік, адамның әлеммен қарым-қатынасы, шындықты іздеу секілді адам жанын үнемі мазалайтын ойлар мен сезімдер хореографиялық миниатюралар арқылы көрерменге ұсынылды. Би өнерін тамашалауға келген қалалықтар екі топтың қойылымдары мен бірлескен туындыларына жоғары бағасын берді.
Айта кетейік, би гастролі аясында «Company E» балет труппасы қазақстандық әріптестерге Бродвей джазы және америкалық заманауи би элементтері бойынша шеберлік сабақтарын өткізуде. «Company E» 2013 жылдан бері Қазақстанда заманауи би бойынша семинарлар өткізіп келеді. 2018 жылы Нұр-Сұлтан қаласында Орталық Азияның бес республикасының 100-ден астам бишілеріне екі апталық би сабақтарын өткізіп, шеберлік сағатын гала-концертпен қорытындылаған болатын.
Айтолқын САМАТОВА, «Семей таңы»{jcomments off}
