Өткен аптада қаламыздағы Қазақ инновациялық академиясында «Цифрландыру жағдайындағы экономикалық және әлеуметтік дамудың өзекті мәселелері» атты тақырыпта конференция өтті. Алқалы басқосуға Семей қаласындағы Назарбаев зияткерлік мектебінің шетелдік оқытушысы Hrvoje Moric, ішкі саясат бөлімінің басшысы Нұржан Есенжолов, Нагасаки университетінің биомедицина ғылымдарының магистрі Арман Несіпхан және оқу орны оқытушылары мен студенттер қатысты.
Семей қаласындағы физика-математика бағытындағы Назарбаев зияткерлік мектебінің оқытушысы Hrvoje Moric «Қазақстан ұлы державалар арасында: Қытай, Ресей, АҚШ &ЕО» тақырыбында баяндама оқып, Қазақстанның алып мемлекеттер арасында ынтымақтастықта өмір сүріп отырғанын жеткізді.
Ал Нагасаки университетінің магистрі Арман Несіпхан Жапонияның экономикалық және әлеуметтік саласын Қазақстанмен салыстырды. Оның айтуынша, Қазақстанда талантты студенттер мен жас ғалымдар көп. Оларға жеткілікті қолдау көрсетілсе, алдағы уақытта Қазақстанның ғылымы мен экономикасы дами түспек.
Қалалық ішкі саясат бөлімі басшысы Нұржан Есенжолов Семей қаласының әлеуметтік-экономикалық жағдайы туралы баяндап, алдағы бес жылда шаһардың дамуы үшін 260 млрд. теңге бөлінетінін жеткізді.
Сонымен қатар, конференция барысында студенттер қауымы шетелден келген қонақтарға сауалдарын қойып, тұщымды жауаптар алды.
Айтолқын САМАТОВА, «Семей таңы»{jcomments off}