Апта сәрсенбісі, 11 желтоқсан күні қала әкімі Ермак Сәлімов Ауған соғысының ардагері Кулов Берікбол Аманжолұлымен кездесті.
Ауған соғысының ардагері семейлік Берікбол Аманжолұлы 30 жылдан кейін Қазақстан Республикасының Ресейдегі Елшілігінде «Әскери қызметі үшін» медалімен марапатталды. 30 жыл бойы ұмытылған медаль Ресей қорғаныс министрлігі мұрағатынан табылыпты.
«Ерлігі үшін» және «Жауын-герлік қызметі үшін» медальдарын қазақстандық жеті жауынгерге ҚР-ның Ресейдегі Елшісі Иманғали Тасмағамбетов табыстаған. Жалпы Қазақстанда аталған медальдар берілуі тиіс 800 адам анықталған. Алдағы уақытта семейлік Сұлтанбек Омаровқа да марапаты қайтарылмақ.
-«Ештен кеш жақсы» демекші, отыз жылдан кейін тиісті марапатымыздың табылғанына қуанып жатырмыз. Жалпы еліміз бойынша жеті адамға медаль берілді. Оның ішінде Парламент депутаты Бақытбек Смағұлов та бар. Ал Шығыс Қазақстаннан жалғыз өзім бардым. Бір қызығы Алматыдағы жол кептелісінің кесірінен ұшағымнан қалып қойдым. Қалалық ішкі саясат бөлімі басшысы Нұржан Есенжоловтың қолдауымен екі ұшақ ауыстырып, әрең үлгердім. ҚР Қорғаныс істер министрлігіне, Ресейдегі елшіміз Иманғали Тасмағамбетовке, қала әкімі Ермак Сәлімовке еңбегімізді елеп жатқаны үшін алғыс білдіремін,- дейді Берікбол Аманжолұлы.
Қабылдау соңында Берікбол Аманжолұлына естелік сыйлық табысталды.
Жадыра ТӨЛЕГЕНҚЫЗЫ, «Семей таңы»{jcomments off}
