Апта сенбісі, 18 қаңтар күні қалалық әкімдіктің мәжіліс залында қала әкімі Ермак Сәлімовтің қатысуымен соғыс ардагері Асқар Рахымбаевқа Ұлы Отан соғысына қатысушы куәлігін тапсыру рәсімі өтті.
Шараға ҚР Жазушылар одағының мүшесі, еңбек ардагері, полковник Алиғаппар Шаймардан, Семей қаласының қорғаныс істері басқармасының тәрбие және идеология бөлімшесінің басшысы Дәулет Ибрагимов, әскери қызметкерлер, Жастар орталығының белсенділері, БАҚ өкілдері және қарт жауынгердің балалары қатысты.
Алғашқы болып сөз алған Семей қаласының әкімі Ермак Бидахметұлы:
– Бүгін біз Ұлы Жеңістің 75 жылдығы қарсаңында қазыналы қарт Асқар Рахымбаевтың куәлігін салтанатты түрде табыстау үшін жиналып отырмыз. Мұны ел қорғаған батырды ұлықтаудың жарқын көрінісі деп білемін. Біз алдыңғы толқын ағаларға, ардагерлерге әрқашан бас иіп, құрмет тұтамыз. Себебі сіздер өшпес ерлік танытып, бізге бейбіт күнді сыйладыңыздар. Асқар ақсақалға мықты денсаулық, мол бақыт, ұзақ ғұмыр тілеймін. Егемендіктің еңсесі биік, тұғыры берік болсын, — деп өз тілегін білдірді.
Қазіргі таңда 95 жасты еңсерген қазыналы қарт Асқар Рахымбаев 1926 жылдың 1 наурызында бұрынғы Семей облысы Ақсуат ауданында дүниеге келген. Мектеп бітіргеннен кейін өз ауылында трактор жүргізушісі болып жұмыс істепті. 1941 жылдың маусым айында, 16 жасында Кеңес әскеріне шақыртылып, 378-ші атқыштар полкінің құрамында соғысады. Румынияның Брашов, Мишель қалаларын жаудан азат етуге қатысады. 1945 жылдың қазан айында бір топ сарбаздармен бірге автотехникалық полкте оқу үшін Баку қаласына жіберіледі. 1949 жылы ҚХР-ға арнайы әскери авиаполк құруға көмек көрсету үшін Қытай азат ету әскерінің 21811 әскери бөліміне жіберіліп, штурман-моторист болады.
Ал 1951 жылы аға сержант шенінде әскерден оралып, туған ауылында еңбек етіп, 1988 жылы зейнеткерлікке шығады. «Отан соғысы» орденімен, «Германияны жеңгені үшін», «Қытай-Кеңес достығы», «Ұлы Отан соғысы», «Ерен еңбегі үшін», «Тың және тыңайған жерлерді игергені үшін», «Еңбек ардагері» медальдарымен марапатталған.
Алайда бүгінгі күнге дейін ақсақал Ұлы Отан соғысына қатысушы деген мәртебеге ие болмаған. Тек енді ғана, соғыс аяқталғаннан кейін 75 жылдан соң, Семей қаласының ардагерлер кеңесінің өтініші бойынша Асқар Рахымбаевқа екінші дүниежүзілік соғыстың қатысушысы мәртебесі берілді.
Қадірменді қария 2000 жылдан бері Семей қаласында тұрып жатыр. Жолдасы Жамалған апа екеуі 11 бала, 29 немере, 44 шөбере тәрбиеледі. Ғасыр жасына таяған Асқар ақсақал да елі үшін сіңірген еңбегі еленіп, осынау куәлікке қол жеткізгеніне ризашылығын білдірді.
Өз тілшіміз
{jcomments off}
