Бірде Абай әкесі Құнанбайға:
— Әке! Мен сенен асып тудым,- десе керек.
Сонда Құнекең:
— Менен асып туамын десең, алдымен маған ұқсап өзіңнен асырып ұл туғызып ал,- деген екен.
Ел аузында жиі айтылатын осы бір оқиғаның рас-өтірігін кім білсін, ең бастысы, шындықтан алшақ еместігі анық.
Таяуда редакциямызға Аягөз ауданының әкімі Дәлдабек Оразбаев телефон соғып:
— Астанадан келдім. Жерлесіміз Ерлан Сыдықовтың «Құнанбай» атты құнды еңбегі шыққанын естіп, құтты болсын айтып қайттым. Өзіммен бірге таяуда бірі ағылшын елінде, екіншісі Астанада жоғары оқу орындарын бітірген Ағжан, Мағжан атты егіз ұлдарымды ерте бардым. Ерлан Сыдықов сияқты ғалым ағаларын балаларыма сыртынан үлгі қылып айтып жүретінмін. Осы жолы еңбек жолдарын бастауға қадам басар алдында ат жалын тартып мінген балаларымды есімі елге белгілі абыройлы азаматпен таныстырып, ғалым ағаларының батасын алу ең үлкен мақсатым болатын. Ерлан Бәтташұлымен кездесу ұлдарыма ерекше әсер қалдырғанын байқадым. Ерлан Бәтташұлы «Құнанбай» атты құнды еңбегін екі ұлыма, өзіме және Аягөз ауданының халқына арнап қолтаңбасымен сыйға тартты,- деп көтеріңкі көңіл-күймен жақсы жаңалығын жеткізді.
ҚР Президенті Қасым-Жомарт Тоқаев Семей өңіріне жасаған сапарында: «Ұлы Абайды ұлықтағанда, оның әкесі Құнанбайдың ел тарихындағы еңбегін ұмытпауымыз қажет»,- деген болатын.
Мәскеудің «Молодая гвардия» баспасынан «Өнегелі адамдар өмірінен» сериясымен жарық көрген жерлесіміз, ҰҒА академигі Ерлан Сыдықовтың «Құнанбай» атты кітабы Ұлы Абайдың 175 жылдық мерейтой жылының маңызын аша түсер құнды еңбек екендігі сөзсіз.
Риза АСАНҚЫЗЫ, «Семей таңы»{jcomments off}
