Семей медицина университетінде, ұлы Абайдың 175 жылдығына орай, «Абай мұрасы – халық қазынасы» атты кітап көрмесі өткізілді.
Шараның шымылдығын Басқарма төрағасы-ректор, медицина ғылымдарының докторы Жүнісов Ерсін Тұрсынханұлы құттықтау сөзімен ашып, «өлмейтұғын артына сөз қалдырған» ұлы Абаймен жақынырақ танысып, оның әлемдік деңгейдегі шығармаларын, ақынның кемеліне келген, көркемдік бітімі жағынан мүлтіксіз өлеңдерін терең түсінуге болатынын айтып, Абайдың сарқылмас мұрасы туралы сөз қозғады.
Іс-шара барысында университетіміздің «Абайтану» ұйымының жетекшісі Жаңанұр Жайырбаеваның ұйымдастыруымен ақын шығармаларынан студенттердің поэзиялық эстафетасы өтті.
Студент жастар «Абай» журналының редакторы М.Оспановтың ұлы ақынның зерттеп, зерделеп оқыған сайын тұңғиыққа жетелейтін терең мазмұнды шығармалары жайлы, хакімнің адами қасиеттері туралы әңгімесін асқан қызығушылықпен тыңдады.
Еліміздің көне шаңырақтарының бірі Абай атындағы кітапхана директорының орынбасары Гүлмира Аязбаева кітапхана қорындағы Абай оқыған, Абай заманынан жеткен сирек кітаптарды таныстырып, ұлы ақынның өмір жолы мен шығармашылығын зерттеушілердің еңбектері туралы тың деректермен бөлісті.
Абайдың «Жидебай-Бөрілі» мемлекеттік қорық-мұражайының ғылыми қызметкері Азамат Қажыбай ұлы ақынның мерейтойы аясында мұражайда өткізіліп жатқан іс-шараларға тоқтала кетіп, жастарды Абай шығармаларын оқуға, ақын әлемін өз бағыттары бойынша зерделеп, зерттеуге шақырды.
Сондай-ақ Абай атындағы әмбебап кітапхананың «Коворкинг» орталығының меңгерушісі Майгүл Батхолдина «Абай мұрасы – халық қазынасы» атты көрмеге шолу жасады. Көрменің «Абай әлемі бейнелеу өнерінде» бөлімінде 1887 жылы Ресейден жер аударылған әуесқой суретші П.Лабановскийдің Абайдың өз бейнесін көріп отырып қарындашпен салған суреті, соннымен қатар Ә.Қастеевтің, Л.Леоновтың, Георгий және Анна Аткниндердің, Н.Өтепбаевтың туындылары қойылған.
Ал «Тас мүсіндегі Абай» бөлімі еліміздегі монументальды мүсін өнерінің дамуының жарқын көрінісі болып табылатын ақынның 1960 жылы Алматы қаласында қойылған ескерткішінен (авторы — Х.Наурызбаев) бастап еліміздегі және алыс-жақын шетелдердегі ескерткіштері туралы сыр шертті.
Аталған шарада университет студенттері Абай әлеміне бойлап, тың деректермен танысты.
Семей медицина университетінің баспасөз қызметі.{jcomments off}