Апта сәрсенбісінде кешкілік мезгілде Аягөз қаласында қатты дауыл тұрып, құйын жүріп өткен болатын. Нақтырақ айтсақ, ауданда жылдамдығы секундына 28 метрге жеткен екпінді жел соғып өтті.
Аталмыш жағдайға орай, ауданда төтенше жағдай жарияланды. ШҚО әкімі Даниал Ахметовтің шұғыл тапсырмасымен аймақ басшысының орынбасары Ба-қытжан Баяхметов бастаған арнайы комиссия құрылып, бүгінде қалада жұмыс жүргізуде.
Оқиға орын алысымен барлық коммуналдық және апаттық қызметтер дауылдың салдарын жоюға кірісті. Облыс әкімінің тапсырмасы бойынша қажетті қаражат бөлінеді. Қалпына келтіру шаралары бір апта ішінде аяқталуы тиіс.
ШҚО Төтенше жағдайлар басқармасының берген мәлі-метіне сүйенсек, Аягөз қала-сындағы орын алған табиғат апаты салдарынан 72 жеке тұрғын үй және 19 көп қабатты үйлер, сондай-ақ 8 әкімшілік ғимараты зардап шеккен. Ағаштар мен бұтақтардың құлауы салдарынан электр желілері үзілген. ШҚ ӨЭК-ның 5 апаттық бригадасының шұғыл әрекет етуінің арқасында жарықсыз қалған 3679 абонентке көп ұзамай кезең-кезеңімен электр энергиясы берілді.
Қалалық ауруханаға түрлі дәрежедегі жарақаттармен 7 адам жүгінген. Қазір жағдайлары тұрақты, стационарда бір науқас жатыр.
Қазіргі уақытта Аягөз қаласында қалпына келтіру, жөндеу жұмыстары жалғасуда. Жойқын дауылдан кейін төтенше және коммуналдық қызметтердің барлық күштері қала көшелеріне шығарылды. «Коммуналдық шаруашылық қызметкерлері, электр мамандары, еріктілер жолдарды құлаған ағаштардан, бағаналардан, құрылыс материалдарының қалдықтарынан, сымдар мен кабельдерден тазартуда. Кейбір аумақтарда тұрғындар өз күштерімен үйлерінің айналасын қалпына келтіруде. Жұмыс қызу қарқынмен жүріп жатыр.
Аягөз аудандық әкімдігі жағдайдың толықтай бақылауда екенін, шығындар есептеліп жатқанын жеткізді. Алапат дауылдан зардап шеккен көп қабатты және жер үйлердің тұрғындарына көмек көрсету жөнінде аудан әкімі Ділдабек Тәжібайұлы Оразбаев жауапты тұлғаларға нақты тапсырмалар берген болатын. Маусымның 17-нен бастап аудан әкімдігі ғимаратында тұрғындардан өтініштер қабылданып жатыр. Комиссия мүшелері зардаптың мөлшерін анықтаған соң көмек көрсетілетін болады.
— Апат айтып келмейді. Тосыннан болған дауылдан бәріміз де тосырқап қалдық. Десе де сабыр түбі сары алтын екендігін ұмытпайық. Қаланы қалпына келтіру үшін жұмыстар жүргізілуде. Бастысы, сын сәтте сергелдеңге түспей, байсалдылық танытайық, — деп жазды Аягөз ауданының әкімі Ділдабек Оразбаев өзінің facebook әлеуметтік желісіндегі парақшасында.
Қазіргі күні аудандық әкімдік қызметкерлері төтенше жағдайға байланысты жергілікті халыққа түсінік беру мақсатында да жұмыс жүргізуде. Қатты дауылдан зардап шеккен азаматтар аудан әкімдігіне келіп өтініш беруде.
«СТ» — ақпарат{jcomments off}
