Семей қаласының Қан орталығында бүгінгі күнге дейін 872 адам плазма доноры болу мақсатында қан тапсырған.
Иммундық плазма дегеніміз — кез келген инфекциялық агенттерге қарсы антиденелері бар адам қанының сұйық бөлігі. Коронавирустық инфекциямен ауырып, сауыққан адамдардың плазмасында осы ауруды жеңуге көмектесетін антиденелер болады. Коронавирустық инфекциямен ауырып, сауыққан адамдардың иммундық плазмасын құю кезінде реципиентте (қан құйылған адам) пассивті иммунитет құрылып, ковид ауруымен күресуге көмектеседі.
— Иммундық плазманы плазмоферез әдісі арқылы дайындайды. Иммундық плазманы донациялау шарасы жай плазманы дайындаудан еш айырмашылығы жоқ, 30-45 минут аралығын қамтиды. Плазманы жинауға арналған барлық аппараттар қауіпсіздік жүйелерімен жабдықталған, олардың жұмыстары мен донордың жағдайын трансфузиолог дәрігерлер мен операциялық мейірбикелер бақылап отырады. Аталмыш шара донор үшін қауіпсіз болып саналады. Донациядан кейін алынған плазма дозасы патогенді әсерсіздендіруге ұшырайды. Плазманың бір донациясынан иммундық плазманың 2-3 стандартты дозасын дайындайды. Айта кету керек, иммундық плазмамен емдеу дербес пайдаланатын әдіс емес, ол коронавирустық инфекцияны емдеудің басқа да әдістерімен бірге қолданылады. Науқастың жай-күйі мен жағдайының ауырлығына байланысты дәрігер жеке ем тәртібін тағайындайды. Иммундық плазманы құю науқастың тез емделіп шығуына көмектеседі, — дейді Семей қалалық Қан орталығы директорының міндетін атқарушы Назигүл Оразданова.
ШҚО әкімі Даниал Ахметов қан плазмасы жинақталған банк ашып, 1000 доза жинауды тапсырғаны белгілі, бүгінде 555 доза дайындалған.
Жерлестеріне көмек қолын созу мақсатында қала тұрғындары шетте қалмай, белсенділік танытуда. Солардың бірі — Тасқын Ахметқазиев.
— Дерттен жазылып шыққан соң, өзге науқастарға көмек көрсетейін деген оймен иммунды плазма доноры болу туралы шешім қабылдадым. Мұқтаж адамға көмегім тиіп, ауруынан айығуына септессем – мен үшін қуаныш,- дейді Тасқын Ахметқазиев.
Айта кету керек, Covid-19 вирусымен ауырып, сауығып шыққан адамдардың барлығы дерлік иммундық плазманың доноры бола алмайды. Иммундық плазманы дайындау үшін донорларды іріктеу қажет, оның талабы — коронавирустық инфекцияларға антиденелердің жеткілікті болуы. Сонымен қатар донор трансфузиялық инфекцияларға алдын ала тест тапсырады және биохимиялық және гематологиялық зерттеулердің нәтижелері қаралады. Сондықтан мамандар донор-реконвалесценттер арасында байыпты түрде іріктеу жүргізеді.
— Иммундық плазма алу жұмыстары толық сауыққаннан кейін кем дегенде екі жұма өткеннен соң жүргізіледі. Донор инфекциядан кейін өзіне-өзі келуі қажет. Донорларға 7 айлық есептік көрсеткіші — 19 446 теңге төлемақы қарастырылған, — дейді Назигүл Амангелдіқызы.
Бүгінгі күні иммунды плазма құйылған 17 адамның 10-ы жазылып шыққан.
Донор болуға ниетті қала тұрғындары тұрғылықты мекенжайы бойынша тіркелген емханаға немесе қан орталығына барып, антиденеге тегін қан тапсыра алады.
Семей қаласы бойынша қосымша ақпаратты 42-15-34 немесе 87754583930 нөмірлері арқылы алуға болады.
Жадыра ТӨЛЕГЕНҚЫЗЫ, «Семей таңы»{jcomments off}