Нәтижелі жұмыспен қамтуды және жаппай кәсіпкерлікті дамытудың 2017 — 2021 жылдарға арналған «Еңбек» мемлекеттік бағдарламасы еліміздің барлық өңірлерінде танымал. Бағдарламаның мақсаты — халықты нәтижелі жұмыспен қамтуға жәрдемдесу және азаматтарды кәсіпкерлікке тарту.
«Еңбек» бағдарламасы бойынша берілетін 200 АЕК мөлшеріндегі мемлекеттік грантқа бағдарламаның бірінші бағыты бойынша оқыған, сондай-ақ «Бастау-Бизнес» жобасы бойынша курс аяқтаған тұлғалар үміткер бола алады. Осы бағдарламаның арқасында қазақстандықтар жаңа дағдыларды үйреніп, жұмыс тауып, өз ісін ашты. Солардың бірі -Бесқарағай ауданының тұрғыны Андрей Тарасов. Андрей Тарасов металл профильден қақпалар мен терезе торларын жасау цехын ашуға 200 АЕК көлемінде өтеусіз грант алған. Бөлінген қаражатқа бизнес-жоспарына сәйкес жабдықтар сатып алып, өз бизнесін жүргізуде. Қазіргі уақытта қақпалар мен терезеге арналған торларды дайындайды және орнатады.
— «Бастау-Бизнес» жобасы аясында оқудан өтіп, грант ұтып, өз бизнесімді дамыта алатынымды түсіндім. Мен өзімнің ауылдастарыма жақсы бизнес жоспар жасап, грант алуға болатынын және ең бастысы қорықпау керектігін айтамын. Мемлекет тарапынан берілетін мұндай көмек ауыл тұрғындары үшін өте маңызды. Президентімізге азаматтарға осындай мүмкіндіктерге жол ашқаны үшін алғысымды білдіргім келеді,- дейді Андрей Тарасов.
Айта кетейік, 2020 жылы Бесқарағай ауданында «Еңбек» мемлекеттік бағдарламасы аясында өзін-өзі жұмыспен қамтығандарға, жастар мен аз қамтылған және көпбалалы отбасыларға, еңбекке қабілетті мүгедектер, қоныс аударушылар, мүмкіндігі шектеулі балаларды тәрбиелеп отырған отбасыларға, барлығы 69 қатысушыға, жаңа бизнес-идеяларын жүзеге асыруға 38 336,4 мың теңге сомасында мемлекеттік грант берілді.
Абай ауданы Саржал ауылының тұрғыны Талант Қаратаев та бағдарламаның көмегімен өз кәсібін ашып, жұмысын жандандырған жандардың бірі. Талант Қаратаев «Бастау — Бизнес» жобасы бойынша кәсіпкерлік негіздерінен курстан өтіп, сертификатқа ие болған соң, жиһаз жасайтын құрылғы алуға 555 600 теңге қайтарымсыз грант алған. Бүгінгі күні жеке кәсіпкер ретінде мемлекеттік кірістер басқармасында тіркеліп, өз жұмысын жүргізіп отыр.
— Мемлекет тарапынан бұрын-соңды ешқандай көмек алмағанмын. «Еңбек» бағдарламасы туралы ақпарат құралдарынан біліп, жұмыспен қамту орталығына бардым. Мемлекеттік бағдарлама аясында қайтарымсыз грант ұтып алдым. Мемлекет тарапынан көрсетіліп жатқан қолдауларға ризашылығымды білдіремін, — дейді Талант Қаратаев.
ШҚО әкімі баспасөз қызметі ақпараты негізінде дайындалды{jcomments off}
